اوپن یونیورسٹی میں استقبالِ رمضان کی روح پرور تقریب
شرکاء میں قرآنِ مجید کے مترجم نسخے تقسیم
اسلام آباد (سپیشل رپورٹر )علامہ اقبال اوپن یونیورسٹی میں استقبالِ رمضان اور تقریبِ تقسیمِ قرآن کا انعقاد کیا گیا۔ تقریب سے خطاب کرتے ہوئے وائس چانسلر پروفیسر ڈاکٹر ناصر محمود نے کہا کہ اگر رمضان المبارک اور قرآن کی برکت کے باوجود ہماری زندگیوں میں عفو و درگزر، اخلاقی پاکیزگی اور برداشت پیدا نہ ہو تو یہ ہمارے لیے لمحہ فکریہ ہے۔ انہوں نے زور دیا کہ قرآن ایک مکمل ضابط حیات ہے جسے سمجھ کر اپنانے میں ہی دنیا و آخرت کی کامیابی مضمر ہے۔تقریب کا اہتمام کلیہ عربی و علومِ اسلامیہ کے شعبہ فکرِ اسلامی، تاریخ و ثقافت نے کیا۔ اس موقع پر ڈین کلیہ، پروفیسر ڈاکٹر محی الدین ہاشمی نے کہا کہ رمضان المبارک قرآنِ کریم کے نزول کا بابرکت مہینہ ہے اور ہمیں حضور نبی کریم ﷺ کی سیرتِ طیبہ کی روشنی میں اپنی زندگیوں کو سنوارنا چاہیے۔ڈاکٹر حافظ طاہر اسلام نے اسٹیج سیکرٹری کے فرائض انجام دیے جبکہ ڈاکٹر ثناء اللہ نے بتایا کہ شعبہ قرآن و تفسیر رمضان میں تجویدُ القرآن کی خصوصی کلاسز کا انعقاد کر رہا ہے۔آخر میں شرکاء میں قرآنِ مجید کے مترجم نسخے بطور تحفہ تقسیم کیے گئے۔تقریب میں یونیورسٹی کے رجسٹرار راجہ عمر یونس، ڈینز، پروفیسرز، فیکلٹی ممبران اور پرنسپل افسران نے شرکت کی۔ شرکاء نے قرآنِ مجید سے اپنے تعلق کو مزید مضبوط بنانے کے عزم کا اعادہ کرتے ہوئے اس روح پرور اور بامقصد تقریب کو نہایت مفید اور بروقت قرار دیا۔
