ملتان (خصوصی رپورٹر)
پنجاب پبلک سروس کمیشن (PPSC) نے مختلف سرکاری محکموں میں خالی اسامیوں کے حتمی نتائج کا اعلان کر دیا ہے۔
جاری کردہ نتائج کے مطابق پنجاب سروس ٹربیونل میں اسسٹنٹ لائبریرین کی ایک اسامی پر محمد ذوالقرنین کامیاب قرار پائے ہیں۔ دوسری جانب، پنجاب فوڈ اتھارٹی میں ویٹرنری آفیسرز کی 64 اسامیوں کے لیے 63 امیدوار حتمی طور پر کامیاب ہو گئے ہیں، جبکہ اقلیتی کوٹے کے لیے مخصوص ایک اسامی پر موزوں امیدوار دستیاب نہ ہونے کے باعث نشست خالی رہ گئی۔ کامیاب امیدواروں میں بابر اشرف، محمد طیب، عثمان ناصر اور عامر سہیل سمیت دیگر شامل ہیں۔
مزید برآں، پی پی ایس سی کی جانب سے پی اینڈ ڈی بورڈ میں اسسٹنٹ ڈائریکٹر کی اسامیوں کے لیے پہلی نظرثانی شدہ میرٹ لسٹ جاری کر دی گئی ہے، جبکہ رنگ روڈ اتھارٹی میں انفورسمنٹ انسپکٹر کی اسامیوں کی پہلی ریوائزڈ میرٹ لسٹ بھی جاری ہو چکی ہے۔ پنجاب پبلک سروس کمیشن کے مطابق کامیاب امیدواروں کی تعنیاتی کے لیے سفارشات جلد حکومتِ پنجاب کو ارسال کر دی جائیں گی۔
