لاہور (ایجو کیشن رپورٹر) پنجاب یونیورسٹی میں سندھ اسٹوڈنٹس کلیکٹو کے زیر اہتمام ہولی کی رنگا رنگ تقریب منعقد ہوئی، جس میں صوبائی وزیر برائے اقلیتی امور رمیش
سنگھ اروڑہ نے بطور مہمانِ خصوصی شرکت کی۔ یہ پہلا موقع ہے کہ کسی صوبائی وزیر نے جامعہ کے کیمپس میں ہولی کی تقریب میں شرکت کی۔
تقریب سے خطاب کرتے ہوئے صوبائی وزیر رمیش سنگھ اروڑہ نے کہا کہ پنجاب حکومت تمام اقلیتوں کے حقوق کے تحفظ اور مذہبی آزادی کو یقینی بنانے کے لیے کوشاں ہے۔ انہوں نے طلبہ کی اس کاوش کو سراہا اور کہا کہ ایسی تقریبات سے صوبوں کے درمیان محبت اور یگانگت کو فروغ ملتا ہے۔
سندھ اسٹوڈنٹس کلیکٹو کے نمائندوں نے صوبائی وزیر کی آمد پر ان کا شکریہ ادا کیا اور سندھ کی روایتی اجرک اور ٹوپی کا تحفہ بھی پیش کیا۔ تقریب میں طلبہ نے ایک دوسرے پر رنگ پھینکے اور روایتی گیتوں پر رقص کر کے خوشی کا اظہار کیا۔
