خواجہ فرید یونیورسٹی میں جنگلی حیات کا عالمی دن منایا گیا

خواجہ فرید یونیورسٹی میں جنگلی حیات کا عالمی دن جوش و خروش سے منایا گیا

رحیم یار خان ( نامہ نگار)خواجہ فرید یونیورسٹی آف انجینئرنگ اینڈ انفارمیشن ٹیکنالوجی کے شعبہ لائف سائنسز کے زیر اہتمام ‘جنگلی حیات کا عالمی دن بھرپور جوش و خروش اور عزم کے ساتھ منایا گیا۔ اس تقریب کا مقصد حیاتیاتی تنوع (Biodiversity) کے تحفظ اور نایاب نسل کے جانوروں اور ان کے قدرتی مسکن کو بچانے کی فوری ضرورت کے بارے میں آگاہی پیدا کرنا تھا۔

تقریب میں فیکلٹی ممبران اور طلباء نے بڑی تعداد میں شرکت کی۔ مقررین نے خطاب کرتے ہوئے اس بات پر زور دیا کہ ماحولیاتی توازن اور آنے والی نسلوں کی بقا کے لیے جنگلی حیات کا تحفظ ناگزیر ہے۔ انہوں نے کہا کہ حیاتیاتی تنوع کو بچانا ہم سب کی اجتماعی ذمہ داری ہے تاکہ کرہ ارض کی پائیداری کو برقرار رکھا جا سکے۔

پروگرام کے اختتام پر طلباء اور شرکاء نے اس عہد کی تجدید کی کہ وہ دنیا کی قیمتی جنگلی حیات کے تحفظ اور قدرتی ماحول کو محفوظ بنانے میں اپنا بھرپور کردار ادا کریں گے۔ یونیورسٹی انتظامیہ کے اس تعلیمی اور شعوری اقدام کو عوامی و سماجی حلقوں میں خوب سراہا گیا۔