ایچ ای سی کا اہم فیصلہ، 1.5 سالہ بی ایڈ ڈگری ایم اے ایجوکیشن اور ایم ایڈ کے مساوی قرار

ایچ ای سی کا اہم فیصلہ: 1.5 سالہ بی ایڈ ڈگری ایم اے ایجوکیشن اور ایم ایڈ کے مساوی قرار

پشاور (سٹاف رپورٹر) ہائر ایجوکیشن کمیشن نے علامہ اقبال اوپن یونیورسٹی سے حاصل کردہ 1.5 سالہ بی ایڈ ڈگری کو باقاعدہ طور پر ایم اے ایجوکیشن اور ایم ایڈ کے مساوی تسلیم کر لیا ہے۔ ایچ ای سی کے اسٹوڈنٹ افیئر ڈویژن کی جانب سے جاری کردہ نوٹیفکیشن کے مطابق، ‘ٹیچر ایجوکیشن روڈ میپ 2022’ کے تحت وہ امیدوار جنہوں نے 16 سالہ تعلیم (ماسٹرز یا بی ایس) کے بعد 1.5 سالہ بی ایڈ مکمل کیا ہے، ان کی یہ ڈگری روایتی ایم اے ایجوکیشن یا ایم ایڈ کے برابر تصور کی جائے گی۔

مراسلے میں واضح کیا گیا ہے کہ 16 سالہ تعلیم کے بعد حاصل کی گئی یہ ڈگری پیشہ ورانہ طور پر مکمل اہمیت کی حامل ہے، جس سے ان ہزاروں طلبہ کو فائدہ ہوگا جو تعلیمی شعبے میں ملازمت یا مزید اعلیٰ تعلیم کے خواہش مند ہیں۔ تاہم، ایچ ای سی نے یہ بھی وضاحت کی ہے کہ کسی بھی یونیورسٹی میں مزید داخلے کے لیے اہلیت کا تعین متعلقہ یونیورسٹی خود کرے گی، جبکہ ملازمت کے لیے امیدوار کی موزونیت کا فیصلہ بھرتی کرنے والا ادارہ اپنے قواعد کے مطابق کرنے کا مجاز ہوگا۔