یونیورسٹی آف ایجوکیشن لاہور میں یومِ حق کے حوالے سے تقریب اور واک کا انعقاد

لاہور(ایجو کیشن رپورٹر)یونیورسٹی آف ایجوکیشن لاہور میں یومِ حق کے حوالے سے ایک پروقار تقریب اور واک کا انعقاد کیا گیا، جس میں طلباء، اساتذہ اور انتظامیہ کی کثیر تعداد نے شرکت کی۔ تقریب کا مقصد قومی یکجہتی، ملکی سلامتی اور افواجِ پاکستان کی خدمات کو خراجِ تحسین پیش کرنا تھا۔

تقریب سے خطاب کرتے ہوئے وائس چانسلر پروفیسر ڈاکٹر عاکف انور چودھری نے کہا کہ گزشتہ سال آج کے دن افواجِ پاکستان نے ملک بھر کے عوام کا سر فخر سے بلند کیا۔ انہوں نے کہا کہ یونیورسٹی آف ایجوکیشن لاہور اپنی نوعیت کی پاکستان کی واحد جامعہ ہے جو 1877 سے تعلیمی جدت اور معیاری تعلیم کے میدان میں سرگرمِ عمل ہے۔

وائس چانسلر نے طلباء سے خطاب کرتے ہوئے کہا کہ رواں سال پاکستان کی خطے میں امن اور جنگ رکوانے کے لیے کی جانے والی کوششیں قابلِ تعریف ہیں، اور نوجوان نسل کو قومی ترقی اور استحکام کے لیے مثبت کردار ادا کرنا چاہیے۔

تقریب کے اختتام پر یومِ حق کے حوالے سے واک کا انعقاد کیا گیا جبکہ ملکی سلامتی، استحکام اور ترقی کے لیے خصوصی دعا بھی کی گئی۔