یونیورسٹی آف انجینئرنگ اینڈ ٹیکنالوجی مردان میں طلبہ کا احتجاج، انتظامیہ کا مؤقف بھی سامنے آگیا

مردان ( نمائندہ خصوصی) یونیورسٹی آف انجینئرنگ اینڈ ٹیکنالوجی مردان میں گزشتہ روز طلباء کی جانب سے شدید احتجاجی مظاہرہ کیا گیا، جس کے جواب میں یونیورسٹی انتظامیہ نے معطل طلبہ کی بحالی کے مطالبے کو مسترد کرتے ہوئے ان کے خلاف سنگین الزامات پر مبنی تفصیلی مؤقف جاری کر دیا ہے۔

طلباء کا احتجاج اور مطالبات

طلباء تنظیم کے زیرِ اہتمام ہونے والے اس احتجاج کے دوران مظاہرین نے یونیورسٹی کا مرکزی گیٹ بند کر دیا اور اپنے مطالبات کے حق میں شدید نعرے بازی کی۔ شرکاء کا مؤقف تھا کہ انتظامیہ کی جانب سے طلباء کے ساتھ حد سے زیادہ سختی برتی جا رہی ہے، لہٰذا معطل کیے گئے طلبہ کو فوری طور پر بحال کر کے انہیں (تعلیم جاری رکھنے کا) دوسرا موقع دیا جانا چاہیے۔ بعض ذرائع کے مطابق اس احتجاج میں یونیورسٹی سے باہر کے افراد کی شرکت بھی دیکھی گئی، جس کے باعث کیمپس میں صورتحال کشیدہ ہو گئی۔

یونیورسٹی انتظامیہ کا سخت مؤقف اور الزامات

دوسری جانب یونیورسٹی انتظامیہ نے مظاہرین کے مطالبات کو مسترد کرتے ہوئے واضح کیا ہے کہ حالیہ تادیبی کارروائیاں معمولی نہیں بلکہ سنگین نوعیت کے واقعات کی بنیاد پر کی گئی ہیں۔ انتظامیہ نے دستیاب ویڈیوز اور رپورٹس کے حوالے سے درج ذیل حقائق سامنے رکھے ہیں:

• طالبات پر حملہ اور کینٹین پر قبضہ: شوواہد کے مطابق چند افراد نے یونیورسٹی میں طالبات پر حملہ کیا، انہیں زبردستی کینٹین سے نکالا اور یونیورسٹی کی سہولیات پر غیر قانونی قبضہ کرنے کی کوشش کی۔ یہ واقعات 6 اور 7 تاریخ کو وارننگ کے باوجود دہرائے گئے۔
• وائس چانسلر کے دفتر پر دھاوا: ڈسپلن کمیٹی کی کارروائی کے دوران مبینہ طور پر ملوث افراد نے وائس چانسلر کے دفتر پر دھاوا بولا اور سیکیورٹی گارڈ پر حملہ کیا، جسے ادارہ جاتی نظم و ضبط کی سنگین خلاف ورزی قرار دیا گیا ہے۔
• خراب تعلیمی ریکارڈ: انتظامیہ کے مطابق ان واقعات میں ملوث افراد کی اپنی تعلیمی کارکردگی انتہائی خراب تھی، جن میں کلاسز سے غیر حاضری اور انتہائی کم سی جی پی اے (CGPA) شامل ہے۔
• بیرونی و سیاسی روابط: انکوائری میں یہ بات بھی سامنے آئی ہے کہ ملوث افراد میں سے بعض کے بیرونی اور سیاسی روابط بھی ہیں۔

یونیورسٹی انتظامیہ کا کہنا ہے کہ ان تمام حقائق کی روشنی میں ذمہ دار افراد کے خلاف سخت تادیبی کارروائی عمل میں لائی گئی ہے اور تعلیمی ماحول کو خراب کرنے والے عناصر کے ساتھ کوئی نرمی نہیں برتی جائے گی۔