بالاکوٹ، پنجاب یونیورسٹی کی بس کھائی میں جا گری، 21 ملازمین زخمی

بالاکوٹ(نمائندہ خصوصی) ناران سے لاہور واپسی کے دوران پنجاب یونیورسٹی کے ملازمین کو لے جانے والی بس ڈمگلہ کے مقام پر حادثے کا شکار ہو کر گہری کھائی میں جاگری، جس کے نتیجے میں 21 افراد شدید و معمولی زخمی ہو گئے۔

ریسکیو 1122 کے مطابق انہوں نے حادثے کی اطلاع ملتے ہی فوری طور پر چار ایمبولینسز، میڈیکل ٹیمیں اور دو ٹرسٹ ایمبولینسز جائے وقوعہ کی طرف روانہ کر دیں۔ ریسکیو اہلکاروں نے بروقت کارروائی کرتے ہوئے تمام زخمیوں کو کھائی سے نکالا اور موقع پر ہی ابتدائی طبی امداد فراہم کرنے کے بعد تحصیل ہیڈکوارٹر ہسپتال بالاکوٹ منتقل کیا۔ بعد ازاں، زخمیوں کی حالت کو مدنظر رکھتے ہوئے انہیں مزید بہتر علاج کے لیے کنگ عبداللہ ٹیچنگ ہسپتال مانسہرہ منتقل کر دیا گیا۔

ریسکیو حکام نے تصدیق کی ہے کہ بس میں سوار تمام افراد پنجاب یونیورسٹی کے ملازمین تھے، جن میں ندیم سلیمان، سید وقار علی، جنید، محمد عرفان، فرقان، یونس، شکیل احمد، محمد ارشد، محمد ریاض، شوکت، عدنان، حافظ رشید، عبدالجبار، نذیر رشید، تنویر حسین، محمد انور، محمد صدیق، نعمان علی، محمد اسحاق، ندیم اور فیاض شامل ہیں۔

دوسری جانب متعلقہ حکام نے حادثے کی اصل وجوہات معلوم کرنے کے لیے تحقیقات کا باضابطہ آغاز کر دیا پنجاب یونیورسٹی کے وائس چانسلر پروفیسر ڈاکٹر محمد علی شاہ نے حادثے پر افسوس کا اظہار کرتے ہوئے ضروری اقدامات کرنے کی ہدایت کی ہے جبکہ صدر اکیڈیمک سٹاف ایسوسی ایشن امجد مگھسی نے بھی واقعہ پر افسوس کا اظہار کیا ہے اور تمام ملازمین کی خیرو عافیت بھی دریافت کی ہے انہوں نے کہا کہ اس حادثے پر تمام اساتذہ برادری ملازمین کے لیے دعا گو ہے