حکومت تعلیمی اداروں کے لیے بجلی کے بلوں کے فنڈز فوری جاری کرے، عوامی حلقوں کا مطالبہ
صوابی (بیورو رپورٹ) پیسکو نے واجبات کی عدم ادائیگی کی بنیاد پر صوابی کے مختلف سرکاری اسکولوں کی بجلی کاٹ دی ہے، جس کے باعث طلبا کو شدید مشکلات کا سامنا ہے۔ متاثرہ اسکولوں میں گورنمنٹ ہائی اسکول کوٹھا، زروئی اور دیگر تعلیمی ادارے شامل ہیں۔
عوامی حلقوں نے اس صورتحال پر شدید تشویش کا اظہار کرتے ہوئے کہا ہے کہ صوبائی حکومت نے سرکاری اسکولوں کے لیے بجلی کے بلوں کی ادائیگی کے فنڈز فراہم نہیں کیے، جس کی سزا معصوم بچوں کو مل رہی ہے۔ شدید گرمی اور حبس کے موسم میں بجلی نہ ہونے کی وجہ سے بچوں کا کلاسوں میں بیٹھنا محال ہو گیا ہے۔ تعلیمی ماہرین کا کہنا ہے کہ تعلیم کے ساتھ مذاق پہلے ہی جاری ہے، اب ہفتے میں تین دن چھٹی دے کر طلبہ کی تعلیمی تباہی کا سلسلہ بند کیا جائے۔
مطالبہ کیا گیا ہے کہ حکومت اور محکمہ تعلیم فوری طور پر بلوں کی ادائیگی کے لیے فنڈز جاری کریں تاکہ اسکولوں کی بجلی بحال ہو سکے، بصورتِ دیگر اسکولوں کو تالے لگانے کے سوا کوئی چارہ نہیں رہے گا۔
