خیبرپختونخوا میں نئے اساتذہ کے لیے ’انڈکشن ٹریننگ پروگرام فیز 5‘ کا باقاعدہ آغاز، 16 ہزار اساتذہ کی جدید پیشہ ورانہ تربیت کے لیے تمام انتظامات مکمل
پشاور (نمائندہ اردو تعلیم ڈاٹ کام) ڈائریکٹوریٹ آف پروفیشنل ڈویلپمنٹ خیبر پختونخوا کے زیرِ اہتمام صوبہ بھر کے نومنتخب اساتذہ کے لیے ”انڈکشن ٹریننگ پروگرام فیز 5“ کا باقاعدہ آغاز آج سے ہو رہا ہے، جس کے لیے تمام تر انتظامی و تدریسی انتظامات کو حتمی شکل دی جا چکی ہے۔
ایڈیشنل ڈائریکٹر اکیڈمکس اخونزادہ شبیر احمد کے مطابق، صوبائی وزیر برائے ابتدائی و ثانوی تعلیم ارشد ایوب ریجنل پروفیشنل ڈویلپمنٹ سینٹر ایبٹ آباد میں انڈکشن پروگرام کا افتتاح کریں گے، جبکہ سیکرٹری ابتدائی و ثانوی تعلیم آر پی ڈی سی میل تانہ ملاکنڈ میں اس اہم پروگرام کا باقاعدہ افتتاح کریں گے۔ یہ تربیتی پروگرام ان تمام اساتذہ کے لیے ترتیب دیا گیا ہے جو حال ہی میں خالصتاً میرٹ پر بھرتی ہوئے ہیں، جن میں پرائمری اور ایلیمنٹری اسکول ٹیچرز دونوں شامل ہیں۔ اس پروگرام کے تحت صوبہ بھر سے تقریباً 16 ہزار نومنتخب اساتذہ کو جدید پیشہ ورانہ تربیت دی جائے گی، جس کے لیے مجموعی طور پر 94 مراکز (بشمول 69 کیمپ سینٹرز) میں بیک وقت کام شروع کیا جا رہا ہے۔