پشاور (نامہ نگار) ڈسٹرکٹ ایجوکیشن آفیسر (میل) پشاور نے گورنمنٹ پرائمری سکول نمبر 5 حیات آباد میں بچوں سے مشقت اور صفائی ستھرائی کروانے پر سخت نوٹس لیتے ہوئے 5 اساتذہ کے خلاف باقاعدہ انکوائری کے احکامات جاری کر دیے ہیں۔
محکمہ تعلیم کی جانب سے جاری اعلامیے کے مطابق ڈپٹی ڈسٹرکٹ ایجوکیشن آفیسر (ڈی ای او) نے حیات آباد سکول کے دورے کے موقع پر بچوں سے کام کرواتے ہوئے دیکھا، جس پر انہوں نے شدید برہمی اور غصے کا اظہار کیا۔ انکوائری کا سامنا کرنے والے اساتذہ میں مختار خان، محمد زاہور خان، محمد ظہیر الدین، قاسم اللہ اور ہلال جاوید شامل ہیں۔
مذکورہ اساتذہ کے خلاف شفاف تحقیقات کے لیے جی پی ایم ایس حیات آباد فیز 3 جے آئی سی ای پشاور کے ہیڈ ماسٹر اشفاق علی شاہ کو انکوائری آفیسر مقرر کیا گیا ہے۔ متعلقہ حکام کو ہدایت کی گئی ہے کہ انکوائری سے متعلق ضروری اندراج اساتذہ کی سروس بکس میں کیا جائے، جبکہ نوٹیفکیشن کی نقل ایس ڈی ای او ایم ٹاؤن ٹو پشاور، متعلقہ سرکل کے اے ایس ڈی ای او (میل) اور دیگر متعلقہ افسران کو ارسال کر دی گئی ہے۔
