لاہور کے سرکاری کالجز کے لیے 60 ہزار کرسیاں خریدنے کی منظوری، 300 نئے کلاس رومز بھی تعمیر کیے جائیں گے
لاہور (خبر نگار) لاہور کے سرکاری کالجز میں طلبہ کو بہتر تعلیمی ماحول اور بنیادی سہولیات فراہم کرنے کے لیے اہم اقدامات کا فیصلہ کیا گیا ہے۔ ڈائریکٹر کالجز لاہور احسن مختار کے مطابق، بڑھتی ہوئی طلبہ کی تعداد کو مدنظر رکھتے ہوئے کالجز کے لیے 60 ہزار نئی کرسیاں خریدنے کی منظوری دے دی گئی ہے۔
اس کے علاوہ، طلبہ کی گنجائش بڑھانے کے لیے 300 نئے کلاس رومز بھی تعمیر کیے جائیں گے۔ احسن مختار کا کہنا ہے کہ کالجز میں موجودہ سہولیات کو مرحلہ وار مکمل کیا جائے گا تاکہ رواں مالی سال کے دوران بنیادی ضرورتوں کی فراہمی کو یقینی بنایا جا سکے۔