اوپن یونیورسٹی میں داخلوں اور انرولمنٹ کی تاریخ 25 فروری تک بڑھا دی گئی
ایم ایس، ایم فل اور پی ایچ ڈی پروگرامز کے داخلے بند
اسلام آبا د( نمائندہ خصوصی)علامہ اقبال اوپن یونیورسٹی نے سمسٹر بہار 2026 کے لیے پہلے سے داخل (جاری) طلبہ کی انرولمنٹ کی تاریخ بغیر کسی لیٹ فیس کے 25 فروری تک بڑھا دی ہے۔ اس توسیع کے تحت میٹرک، ایف اے، ایسوسی ایٹ ڈگری (بی اے/بی کام/بی بی اے)، بی ایس، بی ایڈ پروگرامز، پوسٹ گریجویٹ ڈپلومہ پروگرامز اور مختلف سرٹیفکیٹ کورسز میں نئے طلبہ بھی 25 فروری تک بغیر لیٹ فیس داخلہ حاصل کر سکتے ہیں۔یونیورسٹی انتظامیہ کے مطابق ایم ایس، ایم فل اور پی ایچ ڈی پروگرامز میں داخلوں کی تاریخ میں توسیع ممکن نہیں ہو سکی کیونکہ ان پروگرامز کے لیے انٹری ٹیسٹ کا شیڈول پہلے ہی جاری کیا جا چکا ہے۔ انٹری ٹیسٹ 23 فروری سے 26 فروری تک منعقد ہوں گے۔انرولمنٹ اور نئے داخلوں کی تاریخ میں توسیع کا مقصد طلبہ کو مزید سہولت فراہم کرنا اور زیادہ سے زیادہ طلبہ کو تعلیمی مواقع سے مستفید ہونے کا موقع دینا ہے۔
