کراچی (نیوز رپورٹر) ہائر ایجوکیشن کمیشن کے چیئرمین ڈاکٹر نیاز احمد اختر نے کہا ہے کہ اعلیٰ تعلیم کے شعبے میں مقدار کے بجائے معیار (کوالٹی) کو ترجیح دینا ہوگی۔ 20 عام پرچوں کی اشاعت سے بہتر ہے کہ ایک ایسا تحقیقی پرچہ شائع کیا جائے جس کا عالمی سطح پر ‘امپیکٹ فیکٹر’ ہو۔ ان خیالات کا اظہار انہوں نے سندھ مدرسۃ الاسلام یونیورسٹی کے دورے اور اسمارٹ کلاس روم کے افتتاح کے موقع پر منعقدہ تقریب سے خطاب کرتے ہوئے کیا۔
ڈاکٹر نیاز احمد اختر نے زور دیا کہ تحقیق ایسی ہونی چاہیے جس کا فائدہ براہِ راست معاشرے اور صنعتوں (Industries) کو پہنچے۔ انہوں نے کہا کہ وفاقی اور صوبائی ایچ ای سیز ملک میں اعلیٰ تعلیم کے فروغ کے لیے باہم مل کر کام کریں گے۔ نوجوان محققین اور اساتذہ کو ایسی تحقیق کرنی چاہیے
جس سے پاکستان کا نام روشن ہو۔ اس موقع پر انہوں نے بانیِ پاکستان قائد اعظم محمد علی جناح کے مادرِ علمی سندھ مدرسۃ الاسلام یونیورسٹی کی تاریخی حیثیت کو خراجِ عقیدت پیش کرتے ہوئے وائس چانسلر ڈاکٹر مجیب صحرائی کی کارکردگی کو سراہا۔
تقریب سے وائس چانسلر ڈاکٹر مجیب صحرائی نے بھی خطاب کیا اور یونیورسٹی میں جاری تعلیمی و تحقیقی سرگرمیوں پر روشنی ڈالی۔
