روایتی پیپر مارکنگ سنٹرز ختم، آئندہ امتحانات سے ‘آن سکرین مارکنگ’ کا فیصلہ

 روایتی پیپر مارکنگ سنٹرز ختم، آئندہ امتحانات سے ‘آن سکرین مارکنگ’ کا آغاز

لاہور (سپیشل رپورٹر) بورڈ آف انٹرمیڈیٹ اینڈ سیکنڈری ایجوکیشن  لاہور نے امتحانی نظام میں شفافیت اور جدیدیت لانے کے لیے روایتی پیپر مارکنگ سنٹرز کو ختم کرنے کا بڑا اعلان کر دیا ہے۔

چیئرمین لاہور بورڈ پروفیسر بدر السلام کے مطابق آئندہ سیکنڈ اینول امتحانات سے طلبہ کے پرچوں کی کمپیوٹر پر "آن سکرین مارکنگ” (On-Screen Marking) کی جائے گی۔ اس نئے نظام کے تحت تمام ایگزمینرز کو مارکنگ سنٹرز آنے کی ضرورت نہیں رہے گی اور وہ گھر بیٹھے آن لائن پرچے چیک کر سکیں گے۔

میڈیا سے گفتگو کرتے ہوئے چیئرمین بورڈ نے بتایا کہ آن سکرین مارکنگ سے ایگزمینرز کی جانب سے نمبروں کی گنتی یا چیکنگ میں غلطیوں کے امکانات نہ ہونے کے برابر رہ جائیں گے، جبکہ اساتذہ کو دور دراز کے مارکنگ سنٹرز تک سفر میں پیش آنے والی مشکلات کا بھی خاتمہ ہوگا۔ انہوں نے مزید کہا کہ اس جدید نظام کی بدولت ری چیکنگ سے متعلق طلبہ اور والدین کی شکایات کا فوری ازالہ ممکن ہو سکے گا۔

پروفیسر بدر السلام نے مزید بتایا کہ تعلیمی بورڈ کی جانب سے امیدواروں کو آن لائن داخلہ فارم جمع کروانے کی سہولت بھی فراہم کی جا رہی ہے۔ ان کا کہنا تھا کہ امتحانی مراکزی میں سخت نگرانی کے باعث رواں سال نہم جماعت کا نتیجہ بہتر رہا ہے، اور اب آن سکرین مارکنگ کے نفاذ سے امتحانی نتائج کی شفافیت اور معیار میں مزید بہتری آئے گی۔