راولپنڈی (کرائم رپورٹر)راولپنڈی کے علاقے تھانہ دھمیال کی حدود میں واقع ایک نجی اسکول میں 8 سالہ بچی کے ساتھ مبینہ زیادتی کا افسوسناک واقعہ سامنے آیا ہے، جس پر پولیس نے فوری کارروائی کرتے ہوئے اسکول کے پرنسپل اور چوکیدار کو حراست میں لے لیا ہے۔
والدین کے الزامات اور موقف متاثرہ بچی کے والد کے مطابق ان کی بیٹی نے 21 ستمبر کو اسکول کے چوکیدار کی جانب سے مبینہ زیادتی کا نشانہ بنائے جانے کی شکایت کی۔
جب انہوں نے اسکول انتظامیہ سے رابطہ کیا تو انتظامیہ نے انہیں بلا کر سی سی ٹی وی فوٹیج دکھائی، تاہم مبینہ طور پر کچھ ویڈیوز ڈیلیٹ کی جا چکی تھیں۔ والد نے شدید تحفظات کا اظہار کرتے ہوئے الزام عائد کیا کہ اسکول انتظامیہ اس سنگین واقعے کو چھپانے اور حقائق پر پردہ ڈالنے کی کوشش کر رہی ہے۔
پولیس کا بیانپولیس حکام کا کہنا ہے کہ والدین کی جانب سے درج کرائی گئی شکایت پر کارروائی کرتے ہوئے اسکول کے پرنسپل اور چوکیدار دونوں کو فوری طور پر حراست میں لے لیا گیا ہے۔ والدین کی درخواست کی روشنی میں متاثرہ بچی کا طبی معائنہ کرایا جا رہا ہے، جس کی رپورٹ آنے کے بعد اور تفتیش کی روشنی میں مزید سخت قانونی کارروائی عمل میں لائی جائے گی۔
