تھائی لینڈ: اسکول میں مسلح نوجوان کی فائرنگ، خاتون پرنسپل جاں بحق، طالبہ زخمی
لاہور (مانیٹرنگ ڈیسک): تھائی لینڈ کے شہر ہیٹ یائے میں ایک اسکول کے اندر مسلح نوجوان کی فائرنگ سے خاتون پرنسپل جاں بحق اور ایک طالبہ شدید زخمی ہوگئی۔ پولیس نے 18 سالہ حملہ آور کو گرفتار کر کے تحقیقات کا آغاز کر دیا ہے۔
تفصیلات: بین الاقوامی خبر رساں ادارے کی رپورٹ کے مطابق تھائی لینڈ کے شہر ہیٹ یائے میں اس وقت خوف و ہراس پھیل گیا جب ایک 18 سالہ مسلح نوجوان نے اسکول میں داخل ہو کر اچانک فائرنگ کر دی۔ فائرنگ کے نتیجے میں اسکول کی خاتون پرنسپل اور ایک طالبہ گولیوں کی زد میں آکر شدید زخمی ہوئیں۔ دونوں زخمیوں کو فوری طور پر طبی امداد کے لیے اسپتال منتقل کیا گیا، جہاں خاتون پرنسپل زخموں کی تاب نہ لاتے ہوئے دم توڑ گئیں، جبکہ زیر علاج طالبہ کی حالت خطرے سے باہر بتائی جاتی ہے۔
تحقیقاتی پیش رفت: غیر ملکی میڈیا کے مطابق پولیس نے فائرنگ کرنے والے ملزم کو موقع سے گرفتار کر کے اسلحہ قبضے میں لے لیا ہے۔ پولیس حکام کا کہنا ہے کہ حملے کا اصل مقصد ابھی تک واضح نہیں ہو سکا ہے، تاہم ابتدائی طور پر شبہ ظاہر کیا جا رہا ہے کہ حملہ آور کی اسکول کے کسی استاد کے ساتھ ذاتی رنجش تھی، جس کی بنیاد پر اس نے یہ سنگین قدم اٹھایا۔ پولیس ملزم سے مزید تفتیش کر رہی ہے تاکہ واقعے کے پیچھے چھپے اصل محرکات کا پتا لگایا جا سکے۔
