صوبے بھر میں آٹھویں کے بورڈ امتحانات 9 مارچ سے شروع، رول نمبر سلپس کا بحران سنگین
لاہور (سپیشل رپورٹر) پنجاب بھر میں آٹھویں جماعت کے سالانہ بورڈ امتحانات کا آغاز 9 مارچ سے ہو رہا ہے، جس میں تقریباً 10 لاکھ امیدوار حصہ لیں گے۔ تاہم، امتحانات سے چند روز قبل سینکڑوں طلباء کو رول نمبر سلپس جاری نہ ہونے کے باعث صورتحال تشویشناک ہو گئی ہے۔
ذرائع کے مطابق پیکٹاء (PECTA) نے رول نمبر سلپس اینرولمنٹ ریکارڈ کی بنیاد پر جاری کی ہیں، لیکن اکتوبر کے بعد سکولوں میں داخلہ لینے والے طلباء کو تاحال رولنمبر سلپس فراہم نہیں کی جا سکیں۔ اس انتظامی غفلت کے باعث طلباء اور ان کے والدین شدید ذہنی اذیت اور پریشانی کا شکار ہیں۔
امتحانی عمل کو متاثر ہونے سے بچانے کے لیے ذرائع نے اہم وضاحت کی ہے کہ جن امیدواروں کو رول نمبر سلپس نہیں ملیں، وہ بھی امتحانی مراکز میں بیٹھ سکیں گے۔ ایسے طلباء کو اپنے متعلقہ سکول کے اساتذہ کے ہمراہ سینٹر جا کر اپنی انٹری کروانی ہوگی۔
دوسری جانب، محکمہ تعلیم اور متعلقہ حکام کا دعویٰ ہے کہ 10 لاکھ امیدواروں کے لیے امتحانی مراکز اور دیگر انتظامات مکمل کر لیے گئے ہیں تاکہ امتحانی عمل کو شفاف اور پرامن بنایا جا سکے۔
