پیرس (نیٹ نیوز) فرانس میں طلبا کا سکولوں میں گنجائش سے زیادہ کلاسز، اساتذہ کی کمی اور خستہ حال عمارتوں کے خلاف احتجاج شدید صورتحال اختیار کر گیا ہے۔ جمعرات کو ملک بھر میں 340 ہائی سکولوں کے باہر مظاہرے ہوئے جبکہ 160 سے زائد تعلیمی ادارے بند رہے۔
پیرس اور مارسیلے سمیت مختلف شہروں میں یونیورسٹی طلبا نے بھی احتجاج میں شرکت کرتے ہوئے تقریباً 30 کیمپسز کے داخلی راستے بند کر دیے۔ کئی سکولوں کے باہر کچرے کے ڈبوں کو آگ لگانے کے واقعات بھی پیش آئے۔
طلبا کا کہنا ہے کہ حکومت موبائل فون رکھنے کے لیے مخصوص تھیلوں پر اخراجات کرنے کے بجائے اساتذہ،
ہیٹنگ اور ایئر کنڈیشننگ کی سہولیات بہتر بنائے۔ پولیس کے مطابق مظاہروں کے دوران متعدد افراد کو حراست میں لے لیا گیا ہے۔
