لاہور،نجی یونیورسٹی کی طالبات اور خواتین اساتذہ کو ہراساں کرنے والا ملزم گرفتار

لاہور: یونیورسٹی کی طالبات اور خواتین اساتذہ کو ہراساں کرنے والا ملزم ستوکتلہ پولیس کے ہاتھوں گرفتار

لاہور (سپیشل رپورٹر) یونیورسٹی کی طالبات اور خواتین اساتذہ کو مبینہ طور پر ہراساں کرنے والے ملزم کو ستوکتلہ پولیس نے کارروائی کرتے ہوئے گرفتار کر لیا ہے۔

تفصیلات کے مطابق ملزم کی جانب سے یونیورسٹی کی طالبات اور اساتذہ کو ہراساں کرنے کی ویڈیو سوشل میڈیا پر وائرل ہوئی تھی، جس کا ڈی آئی جی آپریشنز نے فوری نوٹس لیتے ہوئے ملزم کو گرفتار کرنے کی ہدایت کی تھی۔ جس پر ستوکتلہ پولیس نے کارروائی کرتے ہوئے ملزم کو ٹریس کر کے حراست میں لے لیا۔

ذرائع کا کہنا ہے کہ پولیس کے مطابق ملزم ندیم روزانہ یونیورسٹی کے باہر طالبات اور خواتین ٹیچرز کو مبینہ طور پر ہراساں کرتا تھا اور بہانے سے کم عمر طالبات کو گاڑی میں بٹھانے کی کوشش بھی کرتا تھا۔ پولیس نے ملزم کے خلاف مقدمہ درج کر کے اسے مزید تفتیش کے لیے جینڈر سیل کے حوالے کر دیا ہے، جبکہ واقعے میں زیرِ استعمال گاڑی بھی تحویل میں لے لی گئی ہے۔

 یہ واقعہ لاہور میں ستوکتلہ پولیس کی حدود میں واقع ایک نجی یونیورسٹی کے باہر پیش آیا ہے۔