محکمہ تعلیم کے منصوبوں کی نگرانی کے لیے 6 رکنی خصوصی کمیٹی قائم

ایڈیشنل سیکرٹری، ڈپٹی سیکرٹریز اور دیگر متعلقہ افسران کمیٹی کے ارکان ہوں گے، ترقیاتی منصوبے کے مختلف پہلوؤں پر جائزہ لے گی

پشاور (ایجو کیشن رپورٹر) محکمہ تعلیم نے منصوبوں پر موثر نگرانی اور چیک اینڈ بیلنس کے نظام کو مضبوط بنانے کے لیے 6 رکنی ڈویلپمنٹ فنڈز ریلیز کمیٹی تشکیل دے دی ہے۔ کمیٹی میں ایڈیشنل سیکرٹری، ڈپٹی سیکرٹریز اور دیگر متعلقہ افسران کو شامل کیا گیا ہے۔

کمیٹی ہر ترقیاتی منصوبے کے لیے فنڈز جاری کرنے سے قبل مختلف پہلوؤں کا جائزہ لے گی، جن میں منصوبے کے لیے مجموعی طور پر کتنے فنڈز مختص کی گئے ہیں، اس میں خرچ شدہ رقم، منصوبے پر عملی پیش رفت کی جانکاری، مزید کتنے فنڈز درکار ہیں اور منصوبے کے واجبات کتنے ہیں، شامل ہیں۔

نئے طریقہ کار کے تحت کمیٹی منصوبوں کی پیش رفت اور فنڈز کے استعمال سے متعلق تفصیلی کارکردگی رپورٹ مرتب کر کے پلاننگ آفیسر کو فراہم کرے گی، تاکہ آئندہ فنڈز کی منظوری میرٹ اور پیش رفت کی بنیاد پر دی جا سکے۔

دستاویزات کے مطابق کمیٹی اس بات کا بھی تعین کرے گی کہ زیر تعمیر منصوبوں کے لیے مزید فنڈز کس بنیاد پر جاری کیے جائیں، جس کے بعد متعلقہ حکام کو سفارشات پیش کی جائیں گی۔ اس اقدام کا مقصد ترقیاتی منصوبوں میں تاخیر کو کم کرنا، فنڈز کے غیر موثر استعمال کی روک تھام اور منصوبوں کی بروقت تکمیل کو یقینی بنانا ہے۔

یاد رہے کہ خیبرپختونخوا محکمہ تعلیم کے متعدد ترقیاتی منصوبوں کی بروقت تکمیل نہ ہونے کا انکشاف کیا گیا ہے، جس کے باعث کئی منصوبوں کی تکمیل پر آنے والی لاگت میں کروڑوں روپے کے اضافے ہونے کی اطلاعات ہیں۔