تعلیمی بورڈ راولپنڈی کے اکاؤنٹ سے 52 لاکھ سے زائد رقم نکلوانے کی کوشش ناکام، خاتون گرفتار

بینک عملے کی ہوشیاری سے فراڈ کی کوشش ناکام، ملزمہ جوڈیشل ریمانڈ پر جیل منتقل

جعلی لیٹر کی تصدیق پر پولیس کی کارروائی، مقدمہ درج کر کے سہولت کاروں کی تلاش شروع

راولپنڈی (مانیٹرنگ ڈیسک)تعلیمی بورڈ راولپنڈی کے اکاؤنٹ سے 52 لاکھ 45 ہزار روپے نکلوانے کی مبینہ کوشش کو بینک عملے کی مستعدی نے ناکام بنا دیا، جبکہ پولیس نے ملزمہ کو گرفتار کر کے جوڈیشل ریمانڈ پر جیل بھیج دیا ہے۔

ایف آئی آر کے متن کے مطابق ضلع چکوال کی رہائشی ملزمہ قرۃ العین تعلیمی بورڈ کے نام پر ڈرافٹ بنوانے کے لیے بینک پہنچی اور اپنے ساتھ تعلیمی بورڈ کا ایک لیٹر بھی لائی۔ بینک عملے نے لیٹر میں رقم کی غلطی کی نشاندہی کرتے ہوئے درستی کروانے کی ہدایت کی، جس پر خاتون چند منٹ بعد دوسرا لیٹر لے کر دوبارہ بینک آ گئی۔

دوسرے لیٹر پر شک گزرنے پر بینک عملے نے راولپنڈی تعلیمی بورڈ کی متعلقہ برانچ سے رابطہ کر کے تصدیق کی تو بورڈ حکام نے مذکورہ لیٹر کو مکمل طور پر جعلی قرار دے دیا، جس پر فوری طور پر پولیس کو مطلع کیا گیا۔

بینک منیجر کامران سعید کی مدعیت میں ملزمہ کے خلاف تعزیراتِ پاکستان کی دفعات 420، 468 اور 471 کے تحت مقدمہ درج کر لیا گیا۔ پولیس نے ملزمہ کو گرفتار کر کے عدالت میں پیش کیا، جہاں سے اسے جوڈیشل ریمانڈ پر جیل بھیج دیا گیا ہے۔ پولیس کا کہنا ہے کہ واقعے کے دیگر پہلوؤں اور ممکنہ سہولت کاروں کی نشان دہی کے لیے مزید تحقیقات جاری ہیں۔