کراچی (ایجوکیشن رپورٹر) گورنمنٹ کالج یونیورسٹی حیدرآباد کی سابق وائس چانسلر پروفیسر ڈاکٹر طیبہ ظریف کو راولپنڈی ویمن یونیورسٹی کی مستقل وائس چانسلر مقرر کر دیا گیا ہے۔ ان کا یہ تقرر چار برس کی مدت کے لیے کیا گیا ہے۔
تفصیلات کے مطابق، سندھ سے تعلق رکھنے والی معروف ماہر تعلیم پروفیسر ڈاکٹر طیبہ ظریف، جو اس وقت شہید بینظیر بھٹو یونیورسٹی (نوابشاہ) میں ڈین کے عہدے پر خدمات سرانجام دے رہی ہیں، اب راولپنڈی ویمن یونیورسٹی کی انتظامی و تعلیمی سربراہی سنبھالیں گی۔
ڈاکٹر طیبہ ظریف تعلیمی میدان میں وسیع تجربہ رکھتی ہیں، انہوں نے جامعہ کراچی سے شعبہ ایجوکیشن (تعلیم) میں اپنی اعلیٰ تعلیم مکمل کی تھی اور اس سے قبل وہ گورنمنٹ کالج یونیورسٹی حیدرآباد کی وائس چانسلر کے طور پر بھی بہترین خدمات سرانجام دے چکی ہیں۔ ان کی تعیناتی کو تعلیمی حلقوں میں مثبت نظر سے دیکھا جا رہا ہے۔
