پشاور (خبر نگار) پشاور یونیورسٹی ٹیچرز ایسوسی ایشن (پیوٹا) نے جامعہ کی موجودہ مالی و انتظامی صورتحال پر شدید تشویش کا اظہار کرتے ہوئے کہا ہے کہ یونیورسٹی تیزی سے شدید بحران کی جانب بڑھ رہی ہے اور اساتذہ کو تاحال ان کی تنخواہیں نہیں دی گئیں۔
پیوٹا نے واضح کیا کہ تنخواہ اساتذہ کا بنیادی حق ہے، کوئی احسان نہیں،
لہٰذا تمام واجب الادا رقم فوری ادا کی جائے۔ تنظیم نے خزانچی کو مالی امور میں ناکام قرار دیتے ہوئے الزام عائد کیا کہ تنخواہوں میں تاخیر انتظامی نااہلی اور عدمِ جوابدہی کی واضح دلیل ہے۔ پیوٹا کے مطابق انتظامیہ تعلیمی ماحول کو بہتر بنانے اور نئے طلبہ کی دیکھ بھال کے بجائے مزید مسائل پیدا کر رہی ہے۔
تنظیم نے خبردار کیا کہ اگر بحران کو ناقابلِ واپسی حد تک پہنچنے سے پہلے حل نہ کیا گیا تو اساتذہ اپنے حقوق اور جامعہ کی بقا کے لیے تمام قانونی اور جمہوری راستے اپنائیں گے۔
