پشاور (نمائندہ خصوصی) خیبرپختونخوا حکومت نے چیئرمین تعلیمی بورڈ بنوں کو ان کے عہدے سے فارغ کر دیا ہے جس کا باقاعدہ نوٹیفکیشن محکمہ ایلیمنٹری اینڈ سیکنڈری ایجوکیشن نے جاری کر دیا ہے۔
پشاور ہائی کورٹ کے فیصلے اور وزیراعلیٰ خیبرپختونخوا کی منظوری کے بعد گریڈ 19 کے افسر صفت اللہ کو چیئرمین بی آئی ایس ای (BISE) بنوں کی ذمہ داریوں سے سبکدوش کر کے انہیں فوری طور پر اپنے بنیادی محکمہ ہائر ایجوکیشن میں رپورٹ کرنے کی ہدایت کی گئی ہے۔
محکمہ تعلیم کی جانب سے جاری کردہ اعلامیے کے مطابق چیئرمین بنوں بورڈ کی برطرفی کے بعد چیئرمین کوہاٹ بورڈ کو اضافی چارج سونپ دیا گیا ہے جو اگلے تین ماہ تک بنوں تعلیمی بورڈ کے امور کی نگرانی کریں گے۔
یہ احکامات فوری طور پر نافذ العمل ہوں گے اور اس کی نقول وزیراعلیٰ سیکرٹریٹ، چیف سیکرٹری اور صوبے کے تمام تعلیمی بورڈز کو ارسال کر دی گئی ہیں۔
