کراچی میٹروپولیٹن یونیورسٹی کا پاکستان ایجوکیشن اینڈ ریسرچ نیٹ ورک سے الحاق، طلبہ اب عالمی تحقیقی جرائد سے مستفید ہو سکیں گے
کراچی (تعلیمی رپورٹر) کراچی میٹروپولیٹن یونیورسٹی نے طلبہ کے لیے تعلیمی و تحقیقی سہولیات کو بہتر بنانے کے مقصد سے ایک جدید لائبریری کا باقاعدہ افتتاح کر دیا ہے
جس کا افتتاح وائس چانسلر وسیم قاضی اور سندھ ہائر ایجوکیشن کمیشن کے سروش لودھی نے مشترکہ طور پر کیا۔ اس نئی لائبریری میں میڈیکل اور الائیڈ ہیلتھ سائنسز سے متعلق 6 ہزار سے زائد تعلیمی کتب موجود ہیں
جو طلبہ کو مطالعہ کا بہترین ماحول فراہم کریں گی۔ اس اقدام کے ساتھ ساتھ یونیورسٹی نے اپنی ڈیجیٹل لائبریری کو بھی فعال کر دیا ہے اور اسے پاکستان ایجوکیشن اینڈ ریسرچ نیٹ ورک (PERN) سے منسلک کر دیا گیا ہے
جس کی بدولت اب طلبہ اور فیکلٹی ممبران آن لائن تحقیقی جرائد اور عالمی تعلیمی وسائل تک باآسانی رسائی حاصل کر سکیں گے۔ یونیورسٹی انتظامیہ کے مطابق تحقیق اور تعلیمی ترقی کو
مزید فروغ دینے کے لیے آنے والے مہینوں میں ایک انفارمیشن ریسورس سینٹر قائم کرنے کا منصوبہ بھی زیرِ غور ہے۔ یہ اقدامات یونیورسٹی کی جانب سے تعلیمی انفراسٹرکچر کو مضبوط بنانے اور
طلبہ کو جدید دور کے تقاضوں کے مطابق سیکھنے کے مواقع فراہم کرنے کی مسلسل کوششوں کا حصہ ہیں۔