کراچی (خبر نگار / این این آئی) وزیراعظم یوتھ لیپ ٹاپ سکیم کے تحت جناح سندھ میڈیکل یونیورسٹی (جے ایس ایم یو) کے مزید 31 طلبہ کو گورنر ہاؤس کراچی میں منعقدہ ایک خصوصی تقریب کے دوران لیپ ٹاپس دیے گئے۔ یونیورسٹی کے لیے مختص کل 335 لیپ ٹاپس میں سے 304 پہلے ہی تقسیم کیے جا چکے تھے۔
تقریب کے مہمانِ خصوصی گورنر سندھ نہال ہاشمی تھے، جبکہ وزیراعظم یوتھ پروگرام سندھ کے کوآرڈینیٹر ڈاکٹر فہد شفیق نے مہمانِ اعزاز کے طور پر شرکت کی۔ دیگر شرکا میں جے ایس ایم یو کے وائس چانسلر پروفیسر امجد سراج میمن، یونیسیف سندھ کے چیف فیلڈ آفیسر پریم چند بہادر، ایچ ای سی کراچی ریجن کے ڈائریکٹر سلیمان احمد اور گورنر سندھ کے پرنسپل سیکریٹری ڈاکٹر سیف الرحمٰن شامل تھے۔
ایمرسن یونیورسٹی کے وی سی پر ہراساں کرنے کے الزامات، صوبائی محتسب نے سماعت کے لیے تاریخ مقرر کر دی
اس موقع پر گفتگو کرتے ہوئے گورنر سندھ نے بتایا کہ اب تک صوبے کی 33 جامعات میں 20 ہزار سے زائد لیپ ٹاپس تقسیم کیے جا چکے ہیں۔ انہوں نے کہا کہ اس اقدام کا بنیادی مقصد نوجوانوں کو جدید وسائل فراہم کرنا ہے تاکہ وہ تحقیق اور تخلیقی صلاحیتوں کے میدان میں آگے بڑھ سکیں۔
