یتیم طلبہ کے لیے تعلیمی بورڈ ملتان کے نئے اسکالرشپ کا اعلان

اسکالرشپ کے لیے تحصیل بورے والا، ضلع وہاڑی کے طلبہ سے درخواستیں طلب کی گئی ہیں

ملتان (وقائع نگار) تعلیمی بورڈ ملتان کی جانب سے یتیم طلبہ کے لیے نئے اسکالرشپ کا اعلان کر دیا گیا ہے۔ اسکالرشپ کے لیے تحصیل بورے والا، ضلع وہاڑی سے تعلق رکھنے والے ایسے طلبہ سے درخواستیں طلب کی گئی ہیں جنہوں نے میٹرک کا سالانہ امتحان 2026ء ملتان بورڈ سے کامیابی سے پاس کیا ہے اور گیارہویں جماعت میں داخلہ حاصل کر لیا ہے۔

اہلیت کے لیے بنیادی شرائط

• فرسٹ ڈویژن لازمی: امیدوار نے BISE ملتان کے کسی بھی سرکاری یا الحاق شدہ ادارے سے ایس ایس سی (میٹرک) کا پہلا سالانہ امتحان 2026ء کم از کم 60 فیصد نمبروں (فرسٹ ڈویژن) کے ساتھ پاس کیا ہو۔

• صرف فریش  امیدوار اہل: اسکالرشپ کے لیے صرف نئے امیدوار اہل قرار دیے گئے ہیں، جبکہ دوبارہ امتحان دینے والے (Re-appear) اور نمبر بہتر بنانے والے  امیدوار اس کے اہل نہیں ہوں گے۔

• تعلیمی ادارہ اور ڈومیسائل: امیدوار کا تحصیل بورے والا، ضلع وہاڑی کا ڈومیسائل ہونا لازمی ہے، جبکہ اس نے BISE ملتان کے کسی سرکاری یا الحاق شدہ ادارے میں ایچ ایس ایس سی (HSSC) پارٹ-1 (گیارہویں جماعت) میں داخلہ لیا ہو۔

• یتیمی کا ثبوت: امیدوار کا یتیم ہونا ضروری ہے اور اس حوالے سے یونین کونسل، میونسپل کمیٹی، نادرا یا کسی دیگر مجاز اتھارٹی کی جانب سے جاری کردہ ڈیتھ سرٹیفکیٹ کی صورت میں باقاعدہ دستاویزی ثبوت فراہم کرنا ہوگا۔