لاہور،سکولوں میں تعلیمی معیار اور طلبا کی حفاظت کے لیے انتظامیہ متحرک، اسسٹنٹ کمشنرز کی فیلڈ انسپکشنز

لاہور (ایجو کیشن رپورٹر) لاہور میں تعلیمی اداروں کے معیار اور طلباء کی حفاظت کو یقینی بنانے کے لیے ضلعی انتظامیہ نے فیلڈ وزٹس کا سلسلہ تیز کر دیا ہے۔ ڈپٹی کمشنر لاہور کی خصوصی ہدایت پر اسسٹنٹ کمشنرز نے شہر کے مختلف سرکاری اسکولوں کی مفصل انسپیکشنز کیں اور وہاں فراہم کی جانے والی تعلیمی و بنیادی سہولیات کا تفصیلی جائزہ لیا۔

فیلڈ انسپکشنز کے دوران گورنمنٹ گرلز ہائی سکول سنسانی سمیت مختلف تعلیمی اداروں کا دورہ کیا گیا، جہاں خستہ حال باؤنڈری والز اور خطرناک عمارتوں کا باریک بینی سے معائنہ کیا گیا۔ اس موقع پر اسکولوں میں پینے کے صاف پانی کی دستیابی، بجلی کی فراہمی، واش رومز اور کلاس رومز کی صفائی ستھرائی کے نظام کو چیک کیا گیا۔

محکمہ تعلیم کے نام سے آج تعلیمی اداروں میں چھٹی کے 2جعلی نوٹیفکیشن وائرل، وزیرِ تعلیم آفس کی وضاحت

اس کے علاوہ سائنس و آرٹ لیبارٹریز، کمپیوٹر سسٹمز کی بحالی اور فائر سیفٹی کے انتظامات کا بھی خصوصی جائزہ لیا گیا۔

ڈپٹی کمشنر لاہور نے اس عزم کا اعادہ کیا ہے کہ سکولوں میں کلاس رومز کی قلت کو ترجیحی بنیادوں پر دور کیا جائے گا اور خطرناک قرار دی گئی عمارتوں کی فوری تعمیر نو یقینی بنائی جائے گی۔ انہوں نے واضح کیا کہ بچوں کو محفوظ ترین اور بہترین تعلیمی ماحول فراہم کرنے کے لیے اساتذہ کی حاضری اور تدریسی معیار کی کڑی مانیٹرنگ کا عمل مسلسل جاری رہے گا۔