پنجاب حکومت کا بڑا فیصلہ: آؤٹ سورس اسکولوں کے فنڈز اب براہِ راست طالب علموں کے نتائج سے مشروط
لاہور (نمائندہ خصوصی) پنجاب حکومت نے آؤٹ سورس اسکولوں کی تعلیمی کارکردگی جانچنے کے لیے ایک انقلابی اور سخت پالیسی متعارف کروا دی ہے، جس کے تحت سرکاری فنڈز کی ادائیگی کو طلبہ کے امتحانی نتائج سے براہِ راست جوڑ دیا گیا ہے۔ نئی پالیسی کے مطابق اب صرف ان اسکولوں کو فی طالب علم سرکاری رقم ادا کی جائے گی جو 90 فیصد سے زائد کامیاب نتائج فراہم کریں گے، جبکہ کمزور کارکردگی اور ناقص نتائج دینے والے اسکولوں کے فنڈز روک دیے جائیں گے۔
اس نئے نظام کو شفاف بنانے کے لیے ‘پیکٹا’ (PECTA) خصوصی اسکول بیسڈ ٹیسٹ منعقد کرے گا اور ان امتحانات کے نتائج براہِ راست حکومتِ پنجاب کو بھجوائے جائیں گے۔ امتحانی عمل کو سہل بنانے کے لیے پرچوں کی چھپائی کے اخراجات پیکٹا خود برداشت کرے گا، جبکہ امتحانات کی شفافیت یقینی بنانے کے لیے نگرانی کی ذمہ داری ڈویژنل ڈائریکٹرز اور اعلیٰ تعلیم یافتہ افسران کو سونپی گئی ہے۔
ابتدائی تعلیم کی بنیاد پرکھنے کے لیے پہلی اور دوسری جماعت کے طلبہ کا زبانی امتحان (Oral Exam) بھی لیا جائے گا تاکہ تعلیمی معیار کا مکمل جائزہ لیا جا سکے۔ محکمہ تعلیم پنجاب کے حکام کا کہنا ہے کہ اس اقدام کا بنیادی مقصد آؤٹ سورس اسکولوں میں معیارِ تعلیم کو بہتر بنانا اور یہ یقینی بنانا ہے کہ سرکاری خزانے سے صرف ان اداروں کو ادائیگی کی جائے جو عملی طور پر بہتر کارکردگی دکھا رہے ہیں۔