کے پی کے میں تعلیمی اداروں کی ہفتے میں تین دن بندش کا فیصلہ، والدین، اساتذہ اور تعلیمی حلقوں کا نظرثانی کا مطالبہ
پشاور(سپیشل رپورٹر) حکومت کی جانب سے ایندھن کی بچت کے پیشِ نظر تعلیمی اداروں کو ہفتے میں تین دن بند رکھنے کے فیصلے پر والدین، اساتذہ اور تعلیمی حلقوں نے شدید تحفظات کا اظہار کرتے ہوئے اس پر نظرثانی کا مطالبہ کیا ہے۔
مظاہرین اور ماہرینِ تعلیم کا کہنا ہے کہ اس فیصلے سے طلبہ کا تعلیمی مستقبل داؤ پر لگ جائے گا، کیونکہ اس سے قبل ہی سردیوں کی طویل تعطیلات (20 دسمبر سے 3 مارچ تک) کی وجہ سے تدریسی سرگرمیاں بری طرح متاثر ہو چکی ہیں۔
تعلیمی حلقوں کے مطابق طلبہ ملک کا قیمتی اثاثہ ہیں اور ان کے تعلیمی مستقبل کو ہر صورت محفوظ بنانا ضروری ہے۔ حکومت کو چاہیے کہ ایندھن کی بچت کے لیے تعلیمی اداروں کی بندش کے بجائے متبادل طریقے تلاش کرے،
تاکہ پہلے سے سست روی کا شکار تعلیمی عمل مزید تعطل کا شکار نہ ہو۔ اساتذہ کا کہنا ہے کہ ہفتے میں صرف چند دن اسکول کھولنے سے سلیبس کی تکمیل اور امتحانی تیاری ناممکن ہو جائے گی۔