پشاور (تعلیمی رپورٹر) خیبرپختونخوا ایجوکیشن مانیٹرنگ اتھارٹی نے میٹرک کے سالانہ امتحانات 2026 کے دوران امتحانی مراکز میں شفافیت، نظم و ضبط اور موثر نگرانی کو یقینی بنانے کے لیے ایک مربوط نظام وضع کر لیا ہے جس کے تحت صوبہ بھر کے 3520 امتحانی ہالوں کی روزانہ کی بنیاد پر نگرانی کی جائے گی۔
ڈائریکٹر جنرل مانیٹرنگ اتھارٹی منظور احمد آفریدی کے تیار کردہ منصوبے کے مطابق روزانہ ساڑھے 7 سو مانیٹرز مراکز کا دورہ کریں گے جہاں ہر مانیٹر کو دو امتحانی ہالوں کی ذمہ داری سونپی گئی ہے تاکہ نظام کو فعال رکھا جا سکے۔ حکام کے مطابق نگرانی کے دوران امتحانی عمل، ہال میں بجلی، روشنی، طلبہ کے درمیان مناسب فاصلہ، پینے کے صاف پانی اور فرنیچر کی دستیابی جیسے اہم پہلوؤں کا جائزہ لیا جائے گا
جبکہ نگران عملے کی تعداد، سی سی ٹی وی کیمروں کی فعالیت اور مراکز کے اطراف غیر متعلقہ افراد کی موجودگی پر بھی کڑی نظر رکھی جائے گی۔ امتحانی دیانت برقرار رکھنے کے لیے نقل یا کسی بھی مشکوک سرگرمی کی روک تھام کے لیے ڈیش بورڈ کے ذریعے سنگین خلاف ورزیوں پر فوری الرٹس اور پاپ اپس جاری کیے جائیں گے تاکہ بروقت اصلاحی اقدامات ممکن بنائے جا سکیں۔
