آٹھویں کا رزلٹ 30 دنوں کی ریکارڈ مدت میں تیار کیا گیا ہے۔ وزیر تعلیم، پیکٹا ٹیم کی تحسین
( ایجو کیشن رپورٹر)لاہور
پنجاب میں 8 ویں جماعت کے نتائج کا اعلان کر دیا گیا۔ وزیر تعلیم رانا سکندر حیات نے نتائج دیکھنے کیلئے پورٹل کا افتتاح کر دیا۔ پبلک سکولوں کے طلباء 8 ویں کا نتیجہ pectaa.edu.pk پر دیکھ سکتے ہیں۔ آٹھویں جماعت کا مجموعی نتیجہ 88 فیصد رہا۔ وزیر تعلیم رانا سکندر حیات نے کامیاب طلباء اور پیکٹا کے تمام افسران کو مبارکباد دیتے ہوئے کہا ہے کہ آٹھویں کا رزلٹ 30 دنوں کی ریکارڈ مدت میں تیار کیا گیا ہے۔
پاکستان میں پہلی مرتبہ ٹیکنالوجی کے ذریعے مشین مارکنگ کی گئی۔ پیپر چیکنگ میں آرٹیفیشل انٹیلیجنس کے ذریعے شفافیت کو یقینی بنایا گیا ہے۔ انہوں نے کہا کہ میٹرک اور انٹر کے پرچوں میں بھی مشین مارکنگ کے ذریعے نتائج تیار کیے جائیں گے۔ رانا سکندر حیات نے مزید کہا کہ صوبے میں طویل عرصہ بعد بورڈ طرز پر آٹھویں کے امتحان بحال ہوئے۔ دس لاکھ کے قریب طلباء نے امتحان دیا۔ وزیر تعلیم نے کہا کہ بورڈ طرز پر ہشتم امتحانات کا آغاز طلباء کی کارکردگی بہتر انداز میں جانچنے کیلئے کیا گیا ہے۔
شفافیت یقینی بنانے کیلئے پرچوں پر کیو آر کوڈ بھی لگایا گیا تھا۔ اس موقع پر وزیر تعلیم نے اسسٹمنٹ ٹیم کیلئے اعزازیہ کا بھی اعلان کیا جبکہ دوسری جانب وزیر اعلیٰ پنجاب
نے بھی اپنے سوشل میڈیا اکاؤنٹ پر کامیاب طلباء کو مبارکباد دی ہے۔
