آئی ٹی ماہرین کی ڈگریاں اب ڈیجیٹل تصدیق ہوں گی، قومی ڈیجیٹل ٹیلنٹ پول قائم کرنے کا فیصلہ
لاہور (سپیشل رپورٹر) ہائر ایجوکیشن کمیشن (ایچ ای سی) اور پاکستان سافٹ ویئر ایکسپورٹ بورڈ (پی ایس ای بی) کے مابین ڈگریوں کی تصدیق کے نظام کو یکجا کرنے کا اہم معاہدہ طے پا گیا ہے، جس کے تحت اعلیٰ تعلیم یافتہ طلبہ اور آئی ٹی ماہرین کی ڈگریوں کی اب ڈیجیٹل تصدیق کی جائے گی۔
اس سلسلے میں منعقدہ تقریب میں چیئرمین ایچ ای سی ڈاکٹر نیاز احمد اور سی ای او پی ایس ای بی فیصل جدی نے مفاہمت کی یادداشت (ایم او یو) پر دستخط کیے۔ اس موقع پر پاکستان کا پہلا قومی تصدیق شدہ ڈیجیٹل ٹیلنٹ پول قائم کرنے کا بھی فیصلہ کیا گیا۔
ذرائع کے مطابق ڈگری ویری فکیشن کے نظام کی یکجائی سے ڈیجیٹل ورک فورس میں شفافیت اور اعتماد بڑھے گا، جبکہ پاکستانی آئی ٹی پروفیشنلز کے لیے عالمی اور مقامی سطح پر روزگار کے نئے مواقع پیدا ہوں گے۔ تعلیمی اداروں اور صنعت کے باہمی ربط سے ڈیجیٹل پاکستان کے وژن کو تقویت ملے گی۔