واشنگٹن (نیٹ نیوز) امریکہ میں مقیم بھارتی نژاد کم عمر بچے ادوے جین نے محض 3 سال کی عمر میں کتاب شائع
کر کے گنیز ورلڈ ریکارڈ قائم کر دیا ہے۔ بین الاقوامی میڈیا کی رپورٹ کے مطابق امریکی ریاست نیو جرسی کے علاقے
مون ماتھ جنکشن میں 23 اپریل 2022 کو پیدا ہونے والے ادوے جین کی کتاب کا نام ڈینو لرنز ناٹ ٹو ویسٹ فوڈ ہے،
جس میں کھانے کی قدر کرنے اور اسے ضائع کرنے سے گریز کا پیغام دیا گیا ہے۔ رپورٹ میں بتایا گیا ہے کہ 3 سالہ بچہ
مردوں کے زمرے میں کتاب شائع کرنے والا دنیا کا کم عمر ترین شخص بن گیا ہے، جبکہ ادوے جین کو کتاب لکھنے کا
خیال اپنے اسکول میں کھانے کے وقفے کے دوران پیش آنے والے تجربات سے ملا جس نے روزمرہ زندگی کے ایک عام تجربے
کو بچوں کے لیے سبق آموز کہانی میں تبدیل کر دیا۔ گنیز ورلڈ ریکارڈز کے مطابق 3 سالہ بچے کے اس عالمی ریکارڈ
کی تصدیق 3 اپریل 2026 کو نیو جرسی میں کی گئی ہے۔
