پشاور (نامہ نگار) وفاقی محتسب خیبر پختونخوا کے حکم پر اسلامیہ کالج پشاور کے وائس چانسلر اور رجسٹرار کی تنخواہیں آئندہ احکامات تک منجمد کر دی گئی ہیں۔ اس
سلسلے میں اسلامیہ کالج پشاور کے ٹریژرر کی جانب سے باقاعدہ نوٹیفکیشن جاری کر دیا گیا ہے۔
تفصیلات کے مطابق محتسب سیکرٹریٹ کی ہدایت کی روشنی میں وائس چانسلر اور رجسٹرار کی ماہانہ تنخواہیں فوری طور پر روکی گئی ہیں۔ حکم نامے میں کہا گیا ہے کہ وائس چانسلر اور رجسٹرار کو ‘کام کی جگہ خواتین کو ہراساں کیے جانے سے تحفظ کے قانون 2010ء’ کے تحت ٹریبیونل کے احکامات پر عملدرآمد نہ کرنے پر توہین کا مرتکب قرار دیتے ہوئے شوکاز نوٹس جاری کیا گیا تھا
اور دونوں افسران کو ذاتی حیثیت میں پیش ہو کر وضاحت دینے کی ہدایت کی گئی تھی۔
حکم نامے کے مطابق دونوں افسران مقررہ تاریخ پر ٹریبیونل کے سامنے پیش نہیں ہوئے، جس پر ان کی تنخواہیں منجمد کرنے کا حکم جاری ہوا۔ محتسب نے ٹریژرر اسلامیہ کالج پشاور کو ہدایت کی ہے کہ تنخواہیں روکتے ہوئے اس اقدام سے ٹریبیونل کو آگاہ کیا جائے۔ مزید برآں، وائس چانسلر اور رجسٹرار کو دوبارہ شوکاز نوٹس جاری کرتے ہوئے آئندہ سماعت پر ذاتی حیثیت میں پیش ہونے کی ہدایت کی گئی ہے۔
