انگلش ٹریننگ حاصل کرنے والے اساتذہ کو کنوینس الاؤنس دینے کا فیصلہ مراسلہ جاری

پنجاب میں انگلش ٹریننگ حاصل کرنے والے اساتذہ کے لیے بڑی خوشخبری؛ گرمیوں کی چھٹیوں میں بھی کنوینس الاؤنس کٹوتی نہ کرنے کا فیصلہ

محکمہ تعلیم کا تمام سی ای اوز کو ہنگامی مراسلہ؛ ٹریننگ پر مامور اساتذہ ‘آفیشل ڈیوٹی’ پر تصور ہوں گے، الاؤنس جاری رکھا جائے

لاہور (تعلیمی رپورٹر)

محکمہ تعلیم پنجاب کے تحت گرمیوں کی چھٹیوں میں انگلش لینگوئج ٹریننگ حاصل کرنے والے اساتذہ کے لیے ایک بڑی اور اہم خوشخبری سامنے آئی ہے۔ صوبائی حکومت نے ٹریننگ کورسز کا حصہ بننے والے اساتذہ کی حوصلہ افزائی کے لیے موسمِ گرما کی تعطیلات کے دوران ان کے کنوینس الاؤنس (سفری الائونس) کی کٹوتی نہ کرنے کا اصولی فیصلہ کیا ہے۔

پنجاب کی عمومی تعلیمی پالیسی کے مطابق، ہر سال موسمِ گرما کی لمبی چھٹیوں کے دوران اساتذہ کا کنوینس الاؤنس کاٹ لیا جاتا ہے، تاہم موجودہ ٹریننگ پروگرام میں شامل اساتذہ کو اس کٹوتی سے استثنیٰ دے دیا گیا ہے۔

سی ای اوز ایجوکیشن کو باقاعدہ مراسلہ جاری

محکمہ تعلیم پنجاب نے اس فیصلے کو فوری طور پر نافذ کرنے کے لیے صوبے بھر کے تمام چیف ایگزیکٹو آفیسرز (سی ای اوز) ایجوکیشن کو ایک باقاعدہ اور ہنگامی مراسلہ بھجوا دیا ہے۔ مراسلے میں تمام فیلڈ افسران اور اکاؤنٹس دفاتر کو واضح ہدایات جاری کی گئی ہیں کہ ٹریننگ مراکز میں حاضر اساتذہ کا کنوینس الاؤنس کسی صورت نہ کاٹا جائے اور اسے معمول کے مطابق جاری رکھا جائے۔

ٹریننگ حاصل کرنا ‘آفیشل ڈیوٹی’ ہے، حکام کا مؤقف

تعلیمی حکام کا مراسلے میں کہنا ہے کہ جو اساتذہ گرمیوں کی چھٹیوں میں اپنی پیشہ ورانہ صلاحیتوں کو بہتر بنانے کے لیے ان مراکز میں انگلش لینگوئج کی خصوصی تربیت حاصل کر رہے ہیں، ان کا یہ وقت “آفیشل ڈیوٹی” (سرکاری فرائض) تصور کیا جائے گا۔ چونکہ وہ چھٹیوں کے باوجود روزانہ کی بنیاد پر اپنے گھروں سے ٹریننگ سینٹرز کا سفر کر رہے ہیں، اس لیے وہ قانوناً سفری الاؤنس کے حقدار ہیں اور ان کا الاؤنس روکنا سراسر ناانصافی ہوگی۔

تعلیمی حلقوں اور اساتذہ تنظیموں نے محکمہ تعلیم کے اس فیصلے کا خیرمقدم کرتے ہوئے کہا ہے کہ اس اقدام سے ٹریننگ مراکز میں اساتذہ کی حاضری کو سو فیصد یقینی بنانے میں بڑی مدد ملے گی۔