ماحولیاتی توازن برقرار رکھنے اور آلودگی کے خاتمے میں درختوں کا اہم کردار: وائس چانسلر پروفیسر ڈاکٹر آصف علی
ملتان (خصوصی رپورٹر) محمد نواز شریف زرعی یونیورسٹی ملتان میں ڈائریکٹوریٹ آف اسٹیٹ مینجمنٹ کے زیرِ اہتمام شجر کاری اور ماحولیاتی تحفظ کے فروغ کے لیے خصوصی پلانٹیشن ڈرائیو کا انعقاد کیا گیا۔
اس موقع پر وائس چانسلر پروفیسر ڈاکٹر آصف علی نے فیکلٹی ممبران، یونیورسٹی اسٹاف اور طلبہ کے ہمراہ کیمپس کے مختلف مقامات پر پودے لگائے۔
تقریب سے خطاب کرتے ہوئے وائس چانسلر نے کہا کہ درخت ماحولیاتی توازن برقرار رکھنے، فضائی آلودگی کے خاتمے، درجہ حرارت میں کمی اور موسمیاتی تبدیلیوں کے منفی اثرات کو کم کرنے میں انتہائی اہم کردار ادا کرتے ہیں۔ انہوں نے اس بات پر زور دیا کہ جامعات نہ صرف تعلیم و تحقیق کے مراکزی مراکز ہیں بلکہ ماحولیاتی تحفظ اور پائیدار ترقی کے فروغ میں بھی ان کا کردار کلیدی ہے۔
انہوں نے فیکلٹی، اسٹاف اور طلبہ سے اپیل کی کہ شجر کاری کو محض پودے لگانے تک محدود نہ رکھا جائے، بلکہ لگائے گئے پودوں کی مناسب دیکھ بھال، پانی کی باقاعدہ فراہمی اور ان کی حفاظت کو بھی یقینی بنایا جائے تاکہ یہ تناور درخت بن سکیں۔
