بنوں تعلیمی بورڈ میں مبینہ کرپشن کا بازار گرم، ملازمین اور طلبہ سڑکوں پر نکل آئے

قائم مقام چیئرمین امتیاز ایوب کے خلاف شدید احتجاج؛ مالی بے ضابطگیوں اور اقربا پروری کے سنگین الزامات

بنوں (نمائندہ خصوصی) تعلیمی بورڈ بنوں میں مبینہ کرپشن اور بدانتظامی کے خلاف ملازمین اور طلبہ نے محاذ کھول دیا۔ قائم مقام چیئرمین امتیاز ایوب کے خلاف شدید احتجاجی مظاہرہ کیا گیا، جس میں مظاہرین نے بورڈ انتظامیہ کے خلاف سخت نعرے بازی کی اور امتحانی نظام میں ہونے والی بندر بانٹ کو بے نقاب کیا۔

لوٹ مار کا بازار گرم ہے: مقررین مظاہرے سے خطاب کرتے ہوئے بورڈ ایمپلائز یونین کے صدر سمیع الحق درانی، عرفان خان اور دیگر رہنماؤں نے الزام عائد کیا کہ قائم مقام چیئرمین امتیاز ایوب، جو بیک وقت کوہاٹ بورڈ کا چارج بھی رکھتے ہیں، نے بنوں بورڈ کو لوٹ مار کا مرکز بنا دیا ہے۔ انہوں نے کہا کہ اختیارات کا ناجائز استعمال اب برداشت سے باہر ہو چکا ہے۔

امتحانی عملے کی تعیناتیوں میں لاکھوں کے سودے مقررین نے انکشاف کیا کہ میٹرک اور انٹرمیڈیٹ امتحانات کے لیے سپرنٹنڈنٹس، ڈپٹی سپرنٹنڈنٹس اور انویجیلیٹرز کی تعیناتیوں میں میرٹ کی دھجیاں اڑاتے ہوئے لاکھوں روپے کے مبینہ سودے کیے گئے ہیں۔ اس سارے عمل کے لیے ایک مخصوص شخص کو بطور ’ٹاؤٹ‘ استعمال کیا جا رہا ہے جو ملی بھگت سے بندر بانٹ میں مصروف ہے۔

غریب طلبہ ذہنی دباؤ کا شکار مظاہرین کا کہنا تھا کہ امتحانی عملہ طلبہ اور والدین سے ناجائز رقوم وصول کر رہا ہے، جس کی وجہ سے غریب اور مستحق طلبہ شدید ذہنی کرب اور دباؤ کا شکار ہیں۔ پرائیویٹ اسکولز ایسوسی ایشن کے رہنماؤں نے بھی ملازمین کے مطالبات کی حمایت کرتے ہوئے نظام کی شفافیت پر سوالات اٹھائے۔

حکومت سے فوری مداخلت کا مطالبہ مظاہرین نے حکومتِ خیبر پختونخوا اور متعلقہ حکام سے مطالبہ کیا ہے کہ امتیاز ایوب سے بنوں بورڈ کا اضافی چارج فوری طور پر واپس لیا جائے اور بورڈ کے معاملات کی اعلیٰ سطح پر تحقیقات کرائی جائیں تاکہ تعلیمی نظام کی ساکھ کو بچایا جا سکے۔