پشاور (ایجو کیشن رپورٹر) اعلیٰ تعلیمی کمیشن کی ہدایت پر یونیورسٹیز سے الحاق ) رکھنے والے پرائیویٹ تعلیمی اداروں پر مکمل پابندی عائد کر دی گئی ہے۔ کمیشن کے اس فیصلہ کے بعد ہائر ایجوکیشن ریگولیٹری اتھارٹی خیبر پختونخوا نے بھی بندش کا باقاعدہ اعلامیہ جاری کر دیا ہے۔

واضح رہے کہ صوبہ خیبر پختونخوا میں سب سے زیادہ پرائیویٹ تعلیمی ادارے پشاور یونیورسٹی اور خیبر میڈیکل یونیورسٹی سے ملحقہ ہیں۔ اس نئے اقدام سے جہاں متعلقہ اداروں میں تشویش پھیلی ہے، وہیں جامعات کو بھی بڑا مالی دھچکا لگا ہے کیونکہ یونیورسٹیاں الحاق اور امتحانات کی فیسوں کی مد میں ان پرائیویٹ اداروں سے سالانہ کروڑوں روپے حاصل کر رہی تھیں۔

اس صورتحال کے پیش نظر پشاور یونیورسٹی میں پرائیویٹ تعلیمی اداروں کے مالکان اور پرنسپلوں کا ایک اہم اجلاس منعقد ہوا، جس میں اس پابندی اور فیصلے پر گہری تشویش اور شدید تحفظات کا اظہار کیا گیا ہے۔