جی سی یو لاہور کے طالب علم کی 1100 کلومیٹر طویل ’لاہور تا سکردو‘ دوڑ چھٹے روز میں داخل یہ تاریخی مہم پاک فوج اور شہدائے وطن کے نام!

لاہور (ایجوکیشن رپورٹر) گورنمنٹ کالج یونیورسٹی (جی سی یو) لاہور کے شعبہ نفسیات کے طالب علم اور پنجاب حکومت کے سپورٹس ایمبیسیڈر فیضان احمد فیض کی لاہور سے سکردو تک 1100 کلومیٹر طویل دوڑ کی مہم کامیابی کے ساتھ چھٹے روز میں داخل ہو گئی ہے۔ اس عزم الشان سفر کے دوران منگل کے روز انہوں نے گوجر خان سے راولپنڈی تک کا مرحلہ کامیابی سے مکمل کر لیا ہے۔

فیضان احمد فیض پچھلے 8 سالوں سے لانگ ڈسٹنس رننگ سے وابستہ ہیں اور اس سے قبل بھی 800 کلومیٹر کا فاصلہ طے کرنے کا اعزاز رکھتے ہیں۔ انہوں نے اپنی اس تاریخی مہم کا آغاز 28 اگست کو جی سی یو کے یادگار کلاک ٹاور سے کیا تھا، جہاں ان کی والدہ، اساتذہ اور طلبہ نے انہیں نیک تمناؤں اور دعاؤں کے ساتھ روانہ کیا۔

اپنے ایک ویڈیو پیغام میں فیضان کا کہنا تھا کہ اس 1100 کلومیٹر دوڑ کا مقصد تمام سابقہ قومی ریکارڈز توڑ کر ایک نیا قومی ریکارڈ قائم کرنا ہے۔ انہوں نے اپنی اس کوشش کو ملک کی سلامتی کے ضامنوں کے نام کرتے ہوئے کہا: ”میں اپنی یہ تاریخی دوڑ پاکستان کی سیکیورٹی فورسز اور شہداء کے نام کرتا ہوں۔“ اس موقع پر انہوں نے نوجوان نسل کو منشیات سے دور رہنے، کھیلوں کو اپنانے اور ایک صحت مند زندگی گزارنے کا بہترین پیغام بھی دیا۔