سرکاری سکولوں میں تعلیم کے ساتھ سبزیوں کی کاشت لازمی قرار، محکمہ تعلیم کی سخت ہدایات

لاہور(ایجو کیشن رپورٹر)صوبائی محکمہ تعلیم نے تعلیمی اداروں میں تدریسی سرگرمیوں کے ساتھ ساتھ زراعت اور کچن گارڈننگ کو فروغ دینے کے لیے بڑا قدم اٹھاتے ہوئے تمام سرکاری اسکولوں میں موسمی سبزیوں کی کاشت لازمی قرار دے دی ہے۔ اس سلسلے میں محکمہ تعلیم کی جانب سے تمام اسکول سربراہان کو سخت احکامات پر مبنی مراسلہ بھی جاری کر دیا گیا ہے۔

محکمہ تعلیم کے جاری کردہ مراسلے میں ہدایت کی گئی ہے کہ تمام اسکولوں کے ہیڈ ماسٹرز اپنے اپنے اداروں میں موسمی سبزیوں کی کاشت کو ہر صورت یقینی بنائیں۔ سبزیوں کی بہتر نگہداشت، دیکھ بھال اور آبپاشی کے نظام کو سنبھالنے کے لیے اسکول کے اندر ایک ذمہ دار شخص کو نامزد کرنے کی پابندی بھی عائد کی گئی ہے۔

مراسلے میں واضح کیا گیا ہے کہ جن اسکولوں میں گزشتہ روزمرہ میں سبزیوں کی کاشت کے نتائج تسلی بخش نہیں رہے یا پیداوار مناسب نہیں ہوئی، وہاں نئے سرے سے کاشت کاری کی جائے اور پودوں کو بروقت پانی دینے کا باقاعدہ اہتمام کیا جائے۔ شفافیت کو یقینی بنانے کے لیے اسکول انتظامیہ کو روزانہ کی بنیاد پر سبزیوں کی نگہداشت اور ان کی افزائش کی تازہ ترین تصاویر متعلقہ حکام کو ارسال کرنے کا پابند بنایا گیا ہے۔

محکمہ تعلیم نے خبردار کیا ہے کہ تمام اسکولوں کے سربراہان ان ہدایات پر بلا تاخیر اور سختی سے عملدرآمد کو یقینی بنائیں، اور اس معاملے میں کسی قسم کی لاپرواہی برداشت نہیں کی جائے گی۔