اسلام آباد (ایجوکیشن رپورٹر) نوبل انعام یافتہ ملالہ یوسفزئی نے شانگلہ گرلز سکول اینڈ کالج کی طالبات کی شاندار کامیابی پر انہیں مبارکباد پیش کرتے ہوئے بارہویں جماعت کا نتیجہ 100 فیصد آنے پر انتہائی خوشی کا اظہار کیا ہے۔
تفصیلات کے مطابق ملالہ فنڈ کے تعاون سے قائم شانگلہ گرلز سکول اینڈ کالج کی طالبات نےسوات بورڈ کے امتحانات 2025-26 میں شاندار کارکردگی کا مظاہرہ کیا ہے۔ بارہویں جماعت کی تمام طالبات نے 100 فیصد کامیابی حاصل کی، جسے شانگلہ جیسے دور افتادہ علاقے میں بچیوں کو معیاری تعلیم کے مواقع فراہم کرنے کی کوششوں کا اہم ثمر قرار دیا جا رہا ہے۔
اعلی ثانوی تعلیمی بورڈ کراچی، نہم جماعت جنرل گروپ کی مارک شیٹس جاری
ملالہ یوسفزئی نے اپنے نوبیل امن انعام کی رقم سے اس سکول کے قیام کا آغاز کیا تھا اور یہ ادارہ 2018 میں کھولا گیا تھا۔ آج یہاں پرائمری سے بارہویں جماعت تک ایک ہزار سے زائد بچیاں زیرِ تعلیم ہیں۔
ملالہ یوسفزئی نے طالبات، اساتذہ اور ان کے خاندانوں کو اس کامیابی پر مبارکباد دیتے ہوئے کہا کہ یہ نتائج اس بات کا ثبوت ہیں کہ جب بچیوں کو تعلیم، وسائل اور آگے بڑھنے کے مواقع فراہم کیے جائیں تو وہ غیر معمولی کامیابیاں حاصل کر سکتی ہیں۔ گزشتہ برس بھی اس ادارے کی پہلی گریجویٹنگ کلاس کی تمام 29 طالبات نے کامیابی حاصل کی تھی۔
