طلبہ کے لیے ایک لاکھ الیکٹرک (ای) بائیکس فراہم کرنے کا اعلان

لاہور(ایجوکیشن رپورٹر) حکومتِ پنجاب نے صوبے بھر کے طلبہ کے لیے ایک لاکھ الیکٹرک (ای) بائیکس فراہم کرنے کا بڑا اعلان کر دیا ہے، یہ بائیکس طلبہ کو انتہائی آسان اور مکمل طور پر بلاسود اقساط پر فراہم کی جائیں گی۔

صوبائی وزیر تعلیم رانا سکندر حیات کے مطابق اس انقلابی ای بائیک سکیم کے پہلے مرحلے میں صرف طلبہ کو ہی شامل کیا جائے گا تاکہ نوجوان نسل کو سستی، معیاری اور ماحول دوست سفری سہولت میسر آ سکے۔ طلبہ پر مالی بوجھ کم کرنے کے لیے ای بائیک کی ماہانہ قسط انتہائی کم یعنی تقریباً 2,100 روپے مقرر کی گئی ہے۔

وزیر تعلیم نے مزید تفصیلات بتاتے ہوئے کہا کہ حکومت پنجاب بائیکس کی رجسٹریشن اور ڈاؤن پیمنٹ (پیشگی ادائیگی) پر بھاری سبسڈی فراہم کر رہی ہے، جس کے تحت ہر طالب علم کو مجموعی طور پر 70 ہزار روپے تک کی رعایت دی جائے گی، تاکہ غریب اور متوسط طبقے سے تعلق رکھنے والے طلبہ کے لیے بھی ای بائیک کا حصول ممکن ہو سکے۔

رانا سکندر حیات کا کہنا تھا کہ پنجاب بھر کے طلبہ میں ایک لاکھ بائیکس کی تقسیم کا یہ عمل مکمل طور پر سود سے پاک ہوگا تاکہ زیادہ سے زیادہ مستحق طلبہ بنا کسی پریشانی کے حکومت کے اس اقدام سے بھرپور فائدہ اٹھا سکیں۔