فیڈرل بورڈ ،میٹرک نتائج، پہلی افیرا اعجاز،دوسری آمنہ، تیسری پوزیشن حزیفہ نے لےلی

اسلام آباد (ایجو کیشن رپورٹر) وفاقی تعلیمی بورڈ نے نویں اور دسویں جماعت کے سالانہ امتحانات 2026ء کے نتائج کا باضابطہ اعلان کر دیا ہے۔ نتائج کی رو سے افیرا اعجاز نے 1089 نمبرز کے ساتھ پورے بورڈ میں پہلی پوزیشن حاصل کی، جبکہ مجموعی طور پر طالبات میدان مارنے میں پیش پیش رہیں۔
​

نتائج کا باقاعدہ افتتاح وفاقی وزیرِ تعلیم ڈاکٹر خالد مقبول صدیقی نے ایک خصوصی تقریب کے دوران بٹن دبا کر کیا۔
​امتحانات اور نتائج کے اہم اعداد و شمار
​چیئرمین فیڈرل بورڈ نے تقریب کے دوران امتحانی عمل اور نتائج کی تفصیلات پیش کرتے ہوئے بتایا:
​مجموعی شرکت: امتحانات میں کل 2 لاکھ 92 ہزار 831 طلبہ و طالبات نے شرکت کی۔
​امتحانی مراکز و عملہ: ملک بھر میں 1006 مراکز قائم کیے گئے، جبکہ امتحانی شفافیت اور دیکھ بھال کے لیے 2012 سپروائزری اسٹاف، 6996 انویجی لیٹرز اور 4855 پیپر چیکرز نے خدمات انجام دیں۔
​جدت اور شفافیت: فیڈرل بورڈ کی تاریخ میں پہلی بار پرچوں کی چیکنگ میں مصنوعی ذہانت (AI) کا استعمال کیا گیا۔ امتحانات کے دوران نقل کے 86 کیسز رپورٹ ہوئے۔​

کامیابی کا تناسب
​ایس ایس سی پارٹ ون (نہم): کل 1 لاکھ 50 ہزار 077 امیدواروں میں سے 88 ہزار 646 پاس ہوئے، یوں کامیابی کا تناسب 59.77 فیصد رہا۔
​ایس ایس سی پارٹ ٹو (دہم): کل 1 لاکھ 41 ہزار 653 امیدواروں میں سے 1 لاکھ 28 ہزار 070 کامیاب رہے، جبکہ کامیابی کا تناسب 91.33 فیصد ریکارڈ کیا گیا۔
​نمایاں پوزیشن ہولڈرز
​سالانہ امتحانات میں طالبات کی کارکردگی انتہائی شاندار رہی، جہاں ٹاپ 10 پوزیشنز میں سے 7 پوزیشنز طالبات نے اپنے نام کیں

​پہلی پوزیشن: افیرا اعجاز — 1089 نمبرز
​دوسری پوزیشن: آمنہ نعمان — 1088 نمبرز
​تیسری پوزیشن: حذیفہ حیدر — 1086 نمبرز
​

وفاقی وزیرِ تعلیم کا خطاب​

تقریب سے خطاب کرتے ہوئے وفاقی وزیر تعلیم ڈاکٹر خالد مقبول صدیقی نے کامیاب طلبہ، ان کے والدین اور اساتذہ کو مبارکباد دی۔
​انہوں نے کہا کہ کامیابیوں کی یہ تقریب دراصل ہمارے مستقبل کی بنیاد ہے۔ آج کی جدید دنیا میں جو فرد یا قوم خود کو بدلتے ہوئے تقاضوں کے مطابق نہیں ڈھالتی، وہ ترقی کی دوڑ میں پیچھے رہ جاتی ہے۔ اگلے 40 برسوں میں دنیا میں مزید تیز تر تبدیلیاں آئیں گی۔
​ڈاکٹر خالد مقبول صدیقی نے اس بات پر زور دیا کہ علم مومن کی گمشدہ میراث ہے اور اسے اپنی بہترین روایات کے ساتھ ہم آہنگ کر کے آگے بڑھانا ہو گا۔ انہوں نے تعلیمی اداروں کا ماحول مزید سازگار بنانے کی ضرورت پر زور دیتے ہوئے کہا کہ فیڈرل بورڈ کو دیگر تمام صوبائی تعلیمی بورڈز کے لیے ایک مثالی اور ماڈل ادارہ بننا چاہیے۔