نیو دہلی (ویب ڈیسک) پارلیمنٹ کے مانسون اجلاس کے دوران کانگریس اور سماجوادی پارٹی (ایس پی) سمیت اپوزیشن جماعتوں نے نیٹ امتحان میں مبینہ بے ضابطگیوں، مظاہرین طلبہ پر لاٹھی چارج اور رام مندر عطیات کے مبینہ غلط استعمال کے الزامات پر مودی حکومت کو آڑے ہاتھوں لیتے ہوئے شدید احتجاج کیا اور حکومت سے جوابدہی کا مطالبہ کر دیا۔

راجیہ سبھا میں قائد حزب اختلاف اور کانگریس صدر ملکارجن کھڑگے نے پارلیمنٹ کے احاطے میں صحافیوں سے گفتگو کرتے ہوئے الزام عائد کیا کہ حکومت طلبہ کے تئیں انتہائی غیر حساس رویہ اپنا رہی ہے۔ انہوں نے کہا کہ جنتر منتر پر پرامن احتجاج کرنے والے طلبہ پر لاٹھی چارج جمہوریت پر حملہ ہے۔ اگر مودی حکومت شفاف اور منظم امتحانات کا انعقاد نہیں کرا سکتی تو اس کی ذمہ داری کسی اہل ادارے کو سونپ دی جائے۔ انہوں نے مزید کہا کہ مودی حکومت سے کوئی بھی مسئلہ ٹھیک سے حل نہیں ہو پا رہا، ایسے میں انہیں اقتدار میں رہنے کا کوئی حق نہیں۔

ملکارجن کھڑگے نے رام مندر کے عطیات میں مبینہ بدعنوانیاں اٹھاتے ہوئے کہا کہ اس معاملے میں شفافیت ضروری ہے اور وزیر اعظم نریندر مودی کو اس کی ذمہ داری لینی چاہیے۔ انہوں نے الزام لگایا کہ ایک طرف وزیراعظم کے بنائے ہوئے ٹرسٹ میں انہی کے منتخب لوگ ’عطیات چوری‘ کر رہے ہیں جبکہ دوسری طرف لاکھوں طلبہ کا مستقبل برباد ہو رہا ہے، جس کی تمام تر ذمہ داری نریندر مودی اور ان کی حکومت پر عائد ہوتی ہے۔

اس موقع پر کانگریس رکن پارلیمنٹ گرجیت سنگھ اوجلا نے کہا کہ پورا اپوزیشن ایوان میں پیپر لیک کے معاملے پر بحث اور مرکزی وزیر تعلیم دھرمیندر پردھان کے استعفے کا مطالبہ کر رہا ہے کیونکہ حکومت نے تعلیمی نظام کو شدید نقصان پہنچایا ہے۔

کانگریس رکن پارلیمنٹ منیش تیواری نے زور دیا کہ تعلیمی نظام کی ناکامیوں اور رام مندر عطیات کے معاملے پر پارلیمنٹ میں کھل کر بحث ہونی چاہیے تاکہ تمام فریقین اپنا موقف پیش کر سکیں۔

اسی طرح کانگریس رہنما ششی تھرور نے کہا کہ ان کی پارٹی گزشتہ کئی مہینوں سے ’چھاتروں کی گونج‘ مہم کے تحت نیٹ امتحان کا مسئلہ اٹھا رہی ہے۔ انہوں نے حکومت پر تنقید کرتے ہوئے کہا کہ اگر طلبہ کا احتجاج پرامن تھا تو ان پر طاقت اور لاٹھی چارج کا استعمال انتہائی افسوسناک اور سمجھ سے باہر ہے، اور حکومت کو ایوان میں ان تمام قومی مسائل پر بحث سے نہیں بھاگنا چاہیے۔