پشاور یونیورسٹی میں ڈپلوما، سرٹیفکیٹ اور دیگر تمام فیس رعائیتیں ختم

پشاور (نیوز رپورٹر)

یونیورسٹی آف پشاور نے ڈپلوما، سرٹیفکیٹ اور مختلف پروگراموں میں زیرِ تعلیم اور نئے داخلہ لینے والے طلبہ کے لیے فیسوں کے حوالے سے ایک بڑا اور اہم فیصلہ کیا ہے۔ یونیورسٹی انتظامیہ نے ان پروگرامز کے لیے ہر قسم کی فیس رعایت، فیس چھوٹ اور استثنیٰ کو فوری طور پر ختم کرنے کا باقاعدہ اعلان کر دیا ہے۔

رجسٹرار آفس کی جانب سے جاری کردہ آفیشل نوٹیفکیشن کے مطابق، یونیورسٹی کے زیرِ انتظام چلنے والے تمام ڈپلوما اور سرٹیفکیٹ پروگرامز میں داخلہ لینے والے کسی بھی طالب علم، ملازم، یا ان سے وابستہ فرد یا کسی بھی دیگر امیدوار کو فیس میں کسی قسم کی رعایت یا چھوٹ نہیں دی جائے گی۔ نوٹیفکیشن میں واضح طور پر تاکید کی گئی ہے کہ تمام متعلقہ طلبہ اب یونیورسٹی کی جانب سے مقرر کردہ فیس مکمل طور پر جمع کرانے کے پابند ہوں گے۔

فیصلے کا پس منظر اور نفاذ

ذرائع کے مطابق، یہ اہم فیصلہ یونیورسٹی انتظامیہ کی سفارشات اور معزز وائس چانسلر کی حتمی منظوری کے بعد باقاعدہ طور پر نافذ کر دیا گیا ہے۔ اس نئے قانون کا اطلاق ان تمام پروگراموں میں پہلے سے زیرِ تعلیم (پرانے) اور نئے داخلہ لینے والے تمام طلبہ پر یکساں طور پر ہوگا۔

یونیورسٹی حکام کا اس اقدام کے حوالے سے مؤقف ہے کہ ڈپلوما اور سرٹیفکیٹ پروگرامز کی مالیاتی پائیداری کو یقینی بنانے، یونیورسٹی کے ریونیو میں بہتری لانے اور انتظامی امور کو مزید مؤثر و شفاف بنانے کے لیے یہ سخت اقدام اٹھانا ناگزیر ہو چکا تھا۔