پنجاب بھر کے سینکڑوں ہائی اسکولوں کو ہائر سیکنڈری کا درجہ دینے کا فیصلہ،

پنجاب بھر کے سینکڑوں ہائی اسکولوں کو ہائر سیکنڈری کا درجہ دینے کا فیصلہ، ایف اے اور ایف ایس سی کی کلاسز شروع ہوں گی

لاہور (تعلیمی رپورٹر) حکومتِ پنجاب نے صوبے بھر کے سینکڑوں ہائی اسکولوں کو اپ گریڈ کر کے انہیں ‘ہائر سیکنڈری اسکول’ کا درجہ دینے کا اصولی فیصلہ کر لیا ہے۔ اس منصوبے کے تحت طلبہ اب اپنے ہی اسکولوں سے میٹرک کے بعد ایف اے (FA) اور ایف ایس سی (FSc) کی تعلیم حاصل کر سکیں گے۔ اس مقصد کے لیے متعلقہ حکام نے اسکولوں سے جگہ کی دستیابی اور عمارتوں کی حالتِ زار سے متعلق تفصیلی ڈیٹا طلب کر لیا ہے۔

ذرائع کے مطابق پنجاب میں ہائی اسکولوں کی کل تعداد 6 ہزار ہے، جن میں سے 5,800 اسکول اب تک اپنا ڈیٹا فراہم کر چکے ہیں۔ ان میں سے 795 اسکولوں نے جگہ کی دستیابی کی بنیاد پر اپ گریڈیشن کے لیے باقاعدہ خواہش ظاہر کر دی ہے۔ اپ گریڈیشن کا حتمی فیصلہ تھرڈ پارٹی معائنے اور اسکول سربراہان کی فراہم کردہ رپورٹس کی جانچ پڑتال کے بعد کیا جائے گا تاکہ یقینی بنایا جا سکے کہ متعلقہ اسکول اعلیٰ ثانوی تعلیم کے لیے درکار تمام ضروری سہولیات سے لیس ہیں۔