پنجاب,پانچویں جماعت کے امتحانات بھی ‘پیکٹا’ کے تحت لینے کا فیصلہ، رجسٹریشن شیڈول جاری

پنجاب میں آٹھویں کے بعد پانچویں جماعت کے امتحانات بھی ‘پیکٹا’ کے تحت لینے کا فیصلہ، رجسٹریشن شیڈول جاری

لاہور (اسپیشل رپورٹر) حکومتِ پنجاب نے صوبے میں تعلیمی نظام اور امتحانی طریقہ کار کو مزید بہتر بنانے کے لیے ایک بڑا فیصلہ کیا ہے۔ آٹھویں جماعت کے بعد اب پانچویں جماعت کے سالانہ امتحانات بھی پنجاب ایجوکیشن کریکولم، ٹریننگ اینڈ اسیسمنٹ اتھارٹی کے تحت منعقد کیے جائیں گے۔ اس سلسلے میں گریڈ 5 سالانہ اسیسمنٹ 2026-27 کے لیے باقاعدہ رجسٹریشن شیڈول بھی جاری کر دیا گیا ہے۔

رجسٹریشن کا طریقہ کار اور اہم تاریخیں

پیکٹا کے ذرائع کے مطابق پانچویں جماعت کے طلبہ کی رجسٹریشن جدید آئی بی ایس سسٹم کے ذریعے آن لائن کی جائے گی۔

• رجسٹریشن کا آغاز: 25 جون 2026
• آخری تاریخ: 8 اگست 2026

ہیڈ ٹیچرز اور سرکاری اسکولوں کے لیے سخت ہدایات

محکمہ تعلیم پنجاب نے تمام سرکاری سکولوں کے سربراہان کو ہدایت کی ہے کہ وہ مقررہ مدت کے اندر اندر تمام طلبہ کی رجسٹریشن کا عمل لازمی مکمل کریں۔ اس حوالے سے درج ذیل قوانین پر سختی سے عمل درآمد کرنے کا پابند بنایا گیا ہے:

• درست ڈیٹا کی فراہمی: ہیڈ ٹیچرز طلبہ کا مکمل اور بالکل درست ڈیٹا سسٹم پر اپ لوڈ کرنے کے ذمہ دار ہوں گے۔
• تاریخِ پیدائش کی تصدیق: طلبہ کی تاریخِ پیدائش کا سرکاری ریکارڈ (شناختی دستاویزات/داخلہ رجسٹر) کے مطابق ہونا لازمی ہے۔
• تصویر اور دیگر معلومات: رجسٹریشن فارم کے ساتھ طالب علم کی حالیہ پاسپورٹ سائز تصویر اپ لوڈ کرنا ہوگی۔ اس کے علاوہ امتحانی مراکز کی سہولت اور قریبی بینکوں کی معلومات فراہم کرنا بھی ضروری قرار دیا گیا ہے۔

ضلعی انتظامیہ کو احکامات جاری

سپیشل رپورٹر کے مطابق پیکٹا نے پنجاب بھر کے تمام ضلعی تعلیمی افسراناور تعلیمی اداروں کے سربراہان کو مراسلہ جاری کر دیا ہے جس میں تاکید کی گئی ہے کہ رجسٹریشن کے اس پورے عمل کو شفاف اور بروقت مکمل کیا جائے تاکہ طلبہ کو مستقبل میں کسی قسم کی پریشانی کا سامنا نہ کرنا پڑے۔