لاہور(سپیشل رپورٹر) ناران سے لاہور واپسی کے دوران پنجاب یونیورسٹی کے ملازمین کو لے جانے والی بس ڈمگلہ کے مقام پر حادثے کا شکار ہو کر گہری کھائی میں جاگری، جس کے نتیجے میں 16 افراد شدید و معمولی زخمی ہو گئے تھے بس میں مجموعی طور پر 19 ملازمین سوار تھے پنجاب یونیورسٹی انتظامیہ نے گزشتہ روزتمام ملازمین کو لاہور سے جائے حادثہ پربس بھجوا کرواپس گھروں تک پہنچا دیا ہے
مقامی ریسکیو 1122 کے مطابق انہوں نے حادثے کی اطلاع ملتے ہی فوری طور پر چار ایمبولینسز، میڈیکل ٹیمیں جائے وقوعہ پر بھجوا دی تھیں۔ ریسکیو اہلکاروں نے بروقت کارروائی کرتے ہوئے تمام زخمیوں کو کھائی سے نکالا اور موقع پر ہی ابتدائی طبی امداد فراہم کرنے کے بعد تحصیل ہیڈکوارٹر ہسپتال بالاکوٹ منتقل کیا۔ بعد ازاں، زخمیوں کی حالت کو مدنظر رکھتے ہوئے انہیں مزید بہتر علاج کے لیے کنگ عبداللہ ٹیچنگ ہسپتال مانسہرہ منتقل کر دیا گیا پنجاب یونیورسٹی انتظامیہ کی جانب سے حادثے کی اطلاع ملتے ہی فوری یونیورسٹی کی بس بھجوائی گئی اور انہیں جائے حادثہ سے واپس گھروں تک بحفاظت پہنچا دیا گیا
بس میں سوار حادثہ کا شکار ہونے والوں میں ندیم سلیمان، سید وقار علی، جنید، محمد عرفان، فرقان، یونس، شکیل احمد، محمد ارشد، محمد ریاض، شوکت، عدنان، حافظ رشید، عبدالجبار، نذیر رشید، تنویر حسین، محمد انور، محمد صدیق، نعمان علی، محمد اسحاق، ندیم اور فیاض شامل ہیں پنجاب یونیورسٹی کے وائس چانسلر پروفیسر ڈاکٹر محمد علی شاہ کی جانب سے فوری اقدامات اٹھانے پر یونیورسٹی ملازمین اور انکی فیملیز نے انکا شکریہ ادا کیا ہے
جبکہ حادثہ کا شکار ہونے والی ریپڈ بس بھی بذریعہ جی ٹی روڈ واپس یونیورسٹی پہنچ گئی ہے یونیورسٹی انتظامیہ نے حادثہ کے شکار ملازمین کو یونیورسٹی پہنچنے پر رسیو کیا اور انکی خیر خیریت دریافت کی اور انہیں ہر قسم کے اپنے تعاون کا یقین دلایا ہے
